Almatydaǵy jer silkinisi: qalanyń bas polıtseıi málimdeme jasady

ALMATY. KAZINFORM – Almaty qalalyq Polıtsııa departamentiniń basshysy Arystanǵanı Zapparov kúshti jer silkinisinen keıingi megapolıstegi jaǵdaı týraly aıtty.

Almatynyń bas polıtseıi shaharda jaǵdaı turaqty jáne baqylaýda ekenin jetkizdi. Polıtsııa departamentiniń jeke quramy qazirgi kezde kúsheıtilgen rejımde jumys istep jatyr.

«Jalpy qaladaǵy tártipti 2,5 myńǵa jýyq polıtsııa qyzmetkeri qamtamasyz etti, onyń ishinde qalamyzdaǵy jol qaýipsizdigin 70 patrýldi polıtsııa ekıpajdary baqylady. Sondaı-aq tergeý-jedel toptarynyń jumysy kúsheıtildi. Qaladaǵy jedel jaǵdaıdyń asqynýyna jol berilmedi. Jedel basqarý ortalyǵynyń «102» qyzmeti shtatty rejımde jumys isteıdi: qońyraýlar sany kóbeıgen joq», - dep málimdedi Almaty qalasy Polıtsııa departamentiniń bastyǵy, polıtsııa general-maıory Arystanǵanı Zapparov.

Spıkerdiń málimetinshe, azamattardyń múlkiniń saqtalýyn qamtamasyz etý jáne qylmystardyń aldyn alý boıynsha profılaktıkalyq is-sharalar júrgizildi, sonyń nátıjesinde tonaý jáne urlyq derekteri tirkelmedi.

«Túnde qoǵamda jáne áleýmettik jelilerde negizsiz dúrbeleń men úreı týdyrǵan jalǵan aqparat tarady. Búgingi kúnde Almaty PD-niń jedel qyzmetkerleri jalǵan aqparattardyń avtorlaryn anyqtap, jaýapkershilikke tartý jumystaryn júrgizýde. Biz azamattardy aqparattyq mádenıetti saqtaýǵa shaqyramyz jáne tek resmı aqparat kózderinen alynǵan málimetke senýge keńes beremiz», - dep túıindedi Arystanǵanı Zapparov.