Almatydaǵy JEO-ny jańǵyrtý jumystary kúzde aıaqtalady
ALMATY. KAZINFORM – «Eco Almaty» JShS Almatydaǵy ekinshi JEO-ny jańǵyrtý jáne ony gazǵa kóshirý jumystaryna baqylaý júrgizdi. Sonymen qatar jańa gaz stantsııasynyń qurylys barysymen de tanysty.
Almaty ákimdiginiń málimetinshe, qazirgi ýaqytta buryn tek kómirmen jumys istegen JEO-ny gazǵa kóshirý jumystary qolǵa alynǵan. Buǵan deıin stantsııa jyl saıyn shamamen 37 myń tonna zııandy zat shyǵarǵan. Jańa gaz stantsııasy iske qosylǵannan keıin bul kórsetkish 90%-dan astam qysqaryp, jylyna shamamen 2 700 myń tonnaǵa deıin azaıady.
– Parnıktik gazdardyń, sonyń ishinde kómirqyshqyl gazynyń (CO₂) kólemi de azaıady. Eger buryn onyń jyldyq kólemi 4 mln tonnaǵa jýyq bolsa, jańǵyrtýdan keıin bul kórsetkish 2,7 mln tonnaǵa deıin tómendeıdi. Bul qala aýasyndaǵy qatty bólshekter men basqa da zııandy zattardyń mólsherin aıtarlyqtaı azaıtýǵa múmkindik beredi, - dep habarlady ákimdik.
Ekinshi JEO-syn jańǵyrtý jobasy 2023 jyly 31 mamyrda jasalǵan ınvestıtsııalyq kelisim aıasynda iske asyrylyp jatyr. Qujatqa «AlES» AQ pen Dongfang Electric International Corporation, Powerchina Sepco1 Electric Power Construction Co., Ltd jáne Powerchina Hebei Electric Power Engineering Co., Ltd kompanııalarynan quralǵan konsortsıým qol qoıǵan. EPC-kelisimsharttyń jalpy quny – 325,9 mlrd teńge. Joba damý bankteriniń nesıelik qarajaty jáne jeke ınvestıtsııalar esebinen qarjylandyrylady.
– Búginde qosalqy ýchaskeler boıynsha daıyndyq jumystary tolyq aıaqtalǵan. Al jańa gaz stantsııasynyń qurylysy bekitilgen kestege sáıkes júrip jatyr. Jospar boıynsha 2026 jyly shilde aıynyń sońyna deıin qurylystyń birinshi kezeńi, al tamyz-qyrkúıek aılarynda ekinshi kezeńi aıaqtalady. Barlyq iske qosý-baptaý jumystary 2026 jyly 30 qyrkúıekke deıin tolyq bitýge tıis, - delingen habarlamada.
Joba aıaqtalǵannan keıin 2-JEO-nyń elektr qýaty 510 MVt-tan 557 MVt-qa deıin ulǵaıyp, jylý qýaty saǵatyna 952 Gkalǵa deıin jetedi.
Eske salaıyq, buǵan deıin Premer-mınıstr Oljas Bektenov Almatydaǵy ekinshi jáne úshinshi JEO qurylysynyń qarqyny tómendep ketkenin synǵa alǵanyn jazǵanbyz.
Ol bul jumystardy tekserýge orynbasaryn jibergen edi.
