Almatydaǵy JEO-3 qurylysy kesteden edáýir keshigip jatyr
ASTANA. KAZINFORM — Energetıka mınıstri Erlan Aqkenjenov Almatydaǵy JEO-2 jáne JEO-3 qurylys alańdaryna baryp, stantsııalardy tabıǵı gazǵa kóshirý jobalarynyń iske asyrylý barysymen tanysty.
Energetıka mınıstrliginiń habarlaýynsha, JEO-2-de qurylys jumystarynyń jalpy daıyndyq deńgeıi 92%-ǵa jetti. Tehnologııalyq jabdyqtardy jetkizý isi is júzinde tolyq aıaqtalǵan. Qurylys alańynda shamamen 1,5 myń maman men 140-tan astam arnaıy tehnıka jumyldyrylǵan. Sonymen qatar mınıstr qurylys qarqynyn báseńdetpeı, qazirgi deńgeıde saqtaýdy tapsyrdy. Merdiger uıymdarǵa qosymsha beıindi mamandardy, onyń ishinde montajshylar men dánekerleýshilerdi tartý, sondaı-aq iske qosý-baptaý jumystaryn júrgizýge qajetti qujattardy kelisý rásimderin jedel aıaqtaý mindetteldi.
JEO-3-ti tekserý qorytyndysy boıynsha jobany iske asyrýdyń bekitilgen kestesinen edáýir artta qalý faktisi anyqtaldy. Nysannyń jalpy daıyndyq deńgeıi — shamamen 26%. Qurylys alańynda negizgi jabdyqtardy jetkizý merzimderiniń keshigip jatyr.
Sondaı-aq jospar boıynsha shamamen 1 600 adam qajet bolǵanymen, naqty jumys istep jatqan qyzmetkerler sany 600 adamnan aspaıdy. Bul taratý qurylǵysy men basqarý júıelerin qosa alǵanda, stantsııanyń birqatar negizgi nysandaryndaǵy qurylys-montaj jumystarynyń merzimine kesirin tıgizip otyr.
Mınıstr bul kemshilikterge baılanysty tapsyrys berýshi men bas merdigerge qysqa merzim ishinde qurylys qarqynyn kúsheıtýdi, personal sanyn jáne jumyldyrylǵan arnaıy tehnıkany jobalyq talaptarǵa deıin arttyrýdy tapsyrdy.
— Bekitilgen merzimder ózgermeıdi, eshqandaı keıinge qaldyrý máselesi qarastyrylmaıdy! Kadr tapshylyǵyn dereý joıyp, qurylys alańyndaǵy arnaıy tehnıkanyń kólemin birneshe ese arttyrýdy talap etemin, — dedi Erlan Aqkenjenov.
Sondaı-aq jabdyqtardy jetkizýdi jedeldetý boıynsha barlyq qajetti sharany qabyldaý, jumystardy oryndaý kestesin jańartyp, jobany iske asyrýdyń belgilengen merzimderin sózsiz saqtaýdy qamtamasyz etý tapsyryldy.
Mınıstr aldaǵy aptalarda artta qalyp otyrǵan nysanda barlyq qajetti resýrstar tolyq jumyldyrylmaǵan jaǵdaıda, tapsyrys berýshiler men merdigerlerge qatysty qatań sharalar qoldaný bastamasy kóteriletinin málimdedi.
Eske salaıyq, buǵan deıin Premer-mınıstr Oljas Bektenov «Samuryq-Energo» AQ basqarma tóraǵasy Qaırat Maqsutovqa Almatydaǵy úshinshi Jylý elektr ortalyǵy qurylysyn ýaqytyly aıaqtaýdy tapsyrǵan edi.
