Almatydaǵy JEO-2 gazǵa aýysady: joba ýaqytynda aıaqtala ma
ALMATY. KAZINFORM — Almatydaǵy JEO-2 2026 jyldyń qyrkúıegine deıin gazǵa tegis aýysady dep josparlanyp otyr.
Almaty ekologııa departamentiniń basshysy Dinmuhamed Lesbekov Óńirlik kommýnıkatsııalar qyzmetinde ótken brıfıngte JEO-1 2017 jyly tolyqtaı gazǵa aýystyrylǵanyn eske saldy. Qazir JEO-2 nysanynda jańǵyrtý jumystary júrip jatyr. Joba tolyq aıaqtalǵan soń aýaǵa taraıtyn zııandy zattardyń mólsheri jylyna 37 myń tonnadan 2,7 myń tonnaǵa deıin azaıady.
«Almatınskıe elektrıcheskıe stantsıı» AQ-nyń qurylys jobalary departamentiniń jobalyq keńse basshysy Shyńǵys Júırikov jobanyń basty maqsaty — megapolısti energııa jáne jylýmen úzdiksiz qamtamasyz etý múmkindigin saqtaı otyryp, atmosferaǵa taraıtyn zııandy zattardy barynsha azaıtý ekenin aıtty.
Onyń sózinshe, 2023 jyldyń mamyrynda Eýropa qaıta qurý jáne damý bankiniń alańynda úsh qytaılyq kompanııadan quralǵan konsortsıýmmen EPC-kelisimshart jasalǵan. Bul qujat jobanyń barlyq kezeńin — jobalaý men jabdyq jetkizýden bastap, qurylys-montaj jumystaryna deıin qamtıdy.
— Qazirgi ýaqytta tehnıkalyq-ekonomıkalyq negizdeme men jobalyq-smetalyq qujattama memlekettik saraptamadan ótti. Qurylys-montaj jumystary alty ýchaskede qatar júrip jatyr: bir jerde qadalar qaǵylyp jatsa, basqa jerde armatýra ornatý nemese irgetas quıý júrgizilýde. Eki týrbına men eki gaz generatory ornatyldy, úshinshi týrbına jeltoqsannyń sońynda jetkiziledi, — dedi Júırikov.
Onyń aıtýynsha, barlyq jabdyqtyń kelisimsharty jasalyp qoıǵan, olardyń 99%-y jyl sońyna deıin keledi.
— Jobany tapsyrý merzimi — 2026 jyldyń qyrkúıegi. Ázirshe bári josparǵa saı, úlgerip jatyrmyz, — dedi ol.
Júırikovtiń málimetinshe, syrtqy gaz ınfraqurylymy tolyq tartylǵan, al stantsııa aýmaǵynda gazdy daıyndaý pýnkti men qysymdy arttyrý kompressorynyń qurastyrý jumystary aıaqtalyp keledi. Sondaı-aq 15 jyldyq gaz jetkizý sharty jasalǵan.
Eske salaıyq, buǵan deıin «Samuryq-Energo» aktsıonerlik qoǵamynyń basqarma tóraǵasy Qaırat Maqsutov Úkimet otyrysynda Almatydaǵy JEO-lardy gazǵa aýystyrý qashan aıaqtalatynyn aıtqan edi.
Onyń sózinshe, Almaty jylý elektr ortalyqtaryn (JEO-2 jáne JEO-3) gazǵa aýystyrý jumystary bekitilgen kestelerge sáıkes júrip jatyr.