Almatydaǵy Jeltoqsan kóshesindegi BRT iske qosylǵannan keıin júrgizýshilerge aıyppul salyna bastady

ALMATY. KAZINFORM — Almatyda polıtsııa BRT jelisi iske qosylǵannan keıin Jeltoqsan kóshesindegi arnaıy avtobýs jolaǵyna shyqqan júrgizýshilerine aıyppul sala bastady. 

Qalalyq polıtsııa departamentiniń habarlaýynsha, BRT iske qosylǵan alǵashqy kezeńde negizgi nazar aıyppul salýǵa emes, túsindirý jáne aldyn alý jumystaryna aýdaryldy.

Polıtsııa qyzmetkerleri júrgizýshilerge joldaǵy ózgeristerdi túsindirip, jańa jol belgileri men tańbalardyń maǵynasyn kórsetti. Sondaı-aq júrgizýshilerdiń jańa qozǵalys tártibine tezirek úırenýine kómektesti.

— Beıimdelý kezeńi aıaqtalǵannan keıin jol qozǵalysy erejelerin buzǵan júrgizýshilerge qatysty ákimshilik yqpal etý sharalary qabyldana bastaıdy. Ásirese, qoǵamdyq kólikke arnalǵan arnaıy jolaqtarda kólik quraldaryn toqtatý jáne qoıý, sondaı-aq jeke avtokólikterdiń BRT jolaǵyna shyǵý faktilerine erekshe nazar aýdarylady. Quqyq buzýshylyqtar polıtsııa narıadtarymen qatar foto jáne beınebaqylaý quraldary arqyly da tirkeledi, — dedi Almaty polıtsııa departamenti ákimshilik polıtsııa basqarmasynyń bastyǵy Serik Shýmaev.

Polıtsııa júrgizýshilerdi jol qozǵalysyna jaýapkershilikpen qarap, tártip pen ózara qurmetti saqtaýǵa, jol qozǵalysy erejelerin qatań oryndaýǵa jáne qoǵamdyq kóliktiń qozǵalysyna kedergi keltirmeýge úndedi.

Eske salaıyq, buǵan deıin Almatydaǵy Jeltoqsan kóshesinde BRT jelisi iske qosylǵanyn habarlaǵanbyz.

Uzyndyǵy 4,6 shaqyrym bolatyn jańa jeli Tımırıazev kóshesindegi qoldanystaǵy BRT ýchaskesi men Raıymbek batyr dańǵyly boıynda salynyp jatqan aýmaqty jalǵap, ońtústikten soltústikke qaraı úzdiksiz jyldam avtobýs qatynasyn qamtamasyz etedi.