Almatydaǵy Jeltoqsan kóshesinde BRT jelisi iske qosyldy

ALMATY. KAZINFORM — Jeltoqsan kóshesinde BRT (Bus Rapid Transit) jelisiniń iske qosylýyna baılanysty qozǵalysty uıymdastyrýdyń jańa syzbasy engiziledi. 

Almaty ákimdiginiń málimetinshe, uzyndyǵy 4,6 shaqyrym bolatyn jańa jeli Tımırıazev kóshesindegi qoldanystaǵy BRT ýchaskesi men Raıymbek batyr dańǵyly boıynda salynyp jatqan aýmaqty jalǵap, ońtústikten soltústikke qaraı úzdiksiz jyldam avtobýs qatynasyn qamtamasyz etedi.

— Júrgizýshiler jol erejelerin qatań saqtap, joldaǵy tańbalar men belgilerge muqııat nazar aýdarýy qajet. Bul aýmaqta quqyqbuzýshylyqty baqylaýǵa alatyn foto jáne beıne tirkeý júıeleri de jumys isteıdi, — delingen habarlamada.

Joba aıasynda arnaıy jolaqtar jol boıynyń shetinde ornalastyrylǵan. Mundaı sheshim turaqta turǵan kólikter men keptelisten bolatyn qolaısyzdyqtardy azaıtýǵa múmkindik beredi. Soltústik baǵytqa qozǵalǵanda bólingen jolaq kósheniń oń jaǵynda, al keri baǵytta sol jaǵynda syzylǵan. Jeke avtokólikter úshin Abaı dańǵylynan soltústikke qaraı burynǵydaı birjaqty qozǵalys tártibi jáne jolaq sany saqtalady.

Jańa baǵyttar boıynsha avtobýstar 14 jeltoqsannan bastap eki baǵytta da qatynaı bastaıdy. Alǵashqy kezeńde № 92 jáne № 59 marshrýttaryn iske qosý josparlanyp otyr.

— Marshrýttardyń naqty syzbasy men qozǵalys kestesi keıinirek jarııalanady. Aıta keterligi, joba aıasynda barlyq jolaýshyǵa qolaıly bolýy úshin arnaıy kóterińki platformasy bar zamanaýı aıaldama keshenderi ornatyldy. Sonymen qatar eki qabat asfalt tóselip, baǵdarshamdar, jol belgileri, jaryqtandyrý júıesi jańartylyp, trotýar plıtkalary arqyly júrginshiler aımaǵy kóriktendirildi, — dep habarlady Almaty ákimdigi.

Eske salaıyq, buǵan deıin Almatydaǵy jańa BRT qurylysy jáne onymen júretin qoǵamdyq kólikter týraly jazǵanbyz.