Almatydaǵy jeke mekteptegi oqıǵadan keıin tekseris júrgiziledi

ALMATY. KAZINFORM — Almatynyń bala quqyqtary jónindegi ýákili Dıana Erlan jeke mektepterdiń birinde bolǵan jaǵdaıǵa baılanysty túsinik berdi. 

Ýákildiń málimetinshe, Almaty boıynsha bilim sapasyn baqylaý departamenti bul jeke mektepke qatysty erteń tekserý júrgizýdi josparlap otyr.

— Qyz balanyń jaǵdaıy turaqty, jaqyn kúnderi aýrýhanadan shyǵarý josparlanyp otyr. Ata-anasymen baılanystamyn, — dep jazdy ol.

Sondaı-aq ol bul is Naýryzbaı aýdany prokýratýrasynyń qadaǵalaýynda jáne Almaty prokýratýrasynyń baqylaýynda ekenin málimdedi.

Buǵan deıin Almatydaǵy jeke mektepterdiń birinde kámeletke tolmaǵan oqýshyǵa qatysty býllıng boldy degen aqparat boıynsha qylmystyq is qozǵalǵan edi. Alaıda Almaty polıtsııa departamentiniń habarlaýynsha, sotqa deıingi tergeý barysynda bul derekter rastalmaǵan.

Vedomstvonyń málimetinshe, is Naýryzbaı aýdandyq polıtsııa basqarmasynda tirkelgen. Tekserý nátıjesinde býllıng faktileri anyqtalmaǵan. Osyǵan baılanysty qylmystyq is qylmystyq quqyq buzýshylyq quramynyń bolmaýyna baılanysty toqtatyldy.

Eske salaıyq, buǵan deıin balanyń ákesi Qanat Ámirkın áleýmettik jelide oqıǵa týraly jazba jarııalaǵan. Onyń aıtýynsha, qyzy jansaqtaý bólimine túsken. Ákesi bolǵan jaıtqa jeke mekteptegi jaǵdaı sebep boldy dep esepteıdi jáne balasyna psıhologııalyq qysym kórsetilgenin aıtty.