Almatydaǵy jeke mektepte sýıtsıd jasamaq bolǵan oqýshy qyzdyń jaǵdaıy belgili boldy

ALMATY. KAZINFORM — Almaty qalasynyń bala quqyqtary jónindegi ýákili Dıana Erlan jeke mektepterdiń birinde oqıtyn, sýıtsıd jasaýǵa árekettenip, keıin aýrýhanaǵa jetkizilgen oqýshy qyzdyń jaǵdaıyna qatysty túsinik berdi. 

Ol áleýmettik jelidegi paraqshasynda qyzdyń qazirgi ýaqytta medıtsınalyq mekemede dárigerlerdiń baqylaýynda ekenin málimdedi. Dárigerler onyń jaǵdaıyn turaqty dep baǵalap otyr, jaǵdaıy jaqsaryp keledi.

— Qyzdyń ákesimen baılanystamyn, psıhologııalyq kómek usynyldy. Bul jaǵdaı boıynsha Almaty bilim basqarmasy janynan monıtorıngtik top quryldy, sondaı-aq tergeý amaldary júrgizilip jatyr. Oqıǵanyń barlyq mán-jaıy, sebepteri men naqty derekter anyqtalyp jatyr. Tekserý aıaqtalǵanǵa deıin qaýesetter men tekserilmegen aqparatty taratýdan, sondaı-aq úshinshi tulǵalarǵa janama aıyp taǵýdan bas tartýdy suraımyn, — dep jazdy Dıana Erlan.

Buǵan deıin balanyń ákesi Qanat Ámirkın áleýmettik jelide oqıǵa týraly jazba jarııalaǵan. Onyń aıtýynsha, qyzy jansaqtaý bólimine túsken. Ákesi bolǵan jaıtqa jeke mekteptegi jaǵdaı sebep boldy dep esepteıdi jáne balasyna psıhologııalyq qysym kórsetilgenin aıtty.

Almatynyń bilim basqarmasy arnaıy monıtorıngtik top qurylǵanyn habarlady. Top quramyna salalyq bólimshelerdiń, Bilim sapasyn qamtamasyz etý departamentiniń, psıhologııalyq qoldaý jáne bala quqyqtaryn qorǵaý ortalyqtarynyń, qalalyq Qoǵamdyq keńestiń, sondaı-aq quqyq qorǵaý organdarynyń ókilderi kirgen.

— Qazirgi ýaqytta top jeke mekteptegi jumysyn bastady. Oqıǵanyń barlyq mán-jaıy jan-jaqty zerttelip jatyr. Tekserý qorytyndysy boıynsha Qazaqstan Respýblıkasynyń zańnamasyna sáıkes tıisti sharalar qabyldanady. Másele erekshe baqylaýda, — dep málimdedi basqarma ókilderi.

Atalǵan derek boıynsha Almatynyń Naýryzbaı aýdandyq polıtsııa basqarmasy qylmystyq is qozǵady. Qazirgi ýaqytta oqıǵanyń barlyq mán-jaıyn tolyq ári obektıvti anyqtaýǵa baǵyttalǵan qajetti tergeý áreketteri júrgizilip jatyr.

Almaty polıtsııa departamenti jaýapty tulǵalardyń áreketterine quqyqtyq baǵa tergeý nátıjesine sáıkes beriletinin, al protsessýaldyq sheshimder qoldanystaǵy zańnama aıasynda qabyldanatynyn málimdedi.

Eske salaıyq, buǵan deıin endi jeke mektepter tek naqty qajettilik týyndaǵan óńirlerde ǵana ashylatynyn jazǵanbyz.