Almatydaǵy jeke klınıka jalǵan medıtsınalyq anyqtama bergeni úshin tekseriledi
ASTANA. KAZINFORM — Qazaqstan Densaýlyq saqtaý mınıstrligi áleýmettik jelilerde jalǵan medıtsınalyq anyqtamalar men jeke medıtsınalyq kitapshalar berilýi múmkin ekeni týraly aqparat taraǵannan keıin Almatydaǵy «Aıajan» jeke klınıkasyna jospardan tys tekserý júrgizýdi bastaıdy.
QR Densaýlyq saqtaý mınıstrliginiń málimetinshe, tekserýge áleýmettik jelilerde jarııalanǵan jalǵan medıtsınalyq anyqtamalar men jeke medıtsınalyq kitapshalardy berý faktileri bolýy múmkin ekeni týraly aqparat negiz bolǵan.
Vedomstvo zańbuzýshylyqtar rastalǵan jaǵdaıda ýákiletti organdar óz quzyreti sheginde tıisti sharalar qabyldaıtynyn málimdedi.
— Medıtsınalyq qujattar belgilengen talaptarǵa sáıkes naqty júrgizilgen medıtsınalyq tekserýler men zertteýlerdiń nátıjeleri boıynsha ǵana rásimdelýge tıis. Mundaı qujattardy belgilengen tártipti aınalyp ótip rásimdeýge jáne paıdalanýǵa jol berilmeıdi, — dep málimdedi mınıstrlik.
Densaýlyq saqtaý mınıstrligi QR Qylmystyq kodeksiniń 385-babynda jalǵan resmı qujattardy qoldan jasaý, daıyndaý nemese ótkizý, sondaı-aq jalǵan qujattardy kórineý paıdalaný úshin qylmystyq jaýapkershilik kózdelgenin eske saldy.
Bul rette jaýapkershilik qujattardy zańsyz rásimdegen adamdarǵa ǵana emes, jalǵan anyqtamalar men eńbekke ýaqytsha jaramsyzdyq paraqtaryn sanaly túrde satyp alǵan nemese paıdalanǵan azamattarǵa da júktelýi múmkin.
Mınıstrlik medıtsınalyq qujattardy rásimdeýdi baqylaýǵa arnalǵan tsıfrlyq quraldar da damyp jatqanyn habarlady.
2026 jyldyń basynan beri Densaýlyq saqtaý mınıstrliginiń aqparattyq júıeleri arqyly 13,7 mıllıonnan astam elektrondyq medıtsınalyq qujat qalyptastyrylǵan. Onyń ishinde 8 095 396-sy — medıtsınalyq anyqtamalar men eńbekke ýaqytsha jaramsyzdyq paraqtary, al taǵy 5 698 396-sy — dıspanserlik esepke qatysty anyqtamalar. Olardyń qatarynda psıhıatrııa, narkologııa jáne ftızıatrııa baǵyttary boıynsha qujattar bar.
Sonymen qatar eńbekke ýaqytsha jaramsyzdyq paraqtaryn rásimdeý tártibi ózgerdi. Endi qujat medıtsınalyq uıym qyzmetkeriniń elektrondyq tsıfrlyq qoltańbasymen medıtsınalyq aqparattyq júıede qol qoıylǵannan keıin ǵana beriledi.
Azamattyń kelisimimen eńbekke ýaqytsha jaramsyzdyq paraǵynyń ashylǵany jáne uzartylǵany týraly aqparat jumys berýshige hr.enbek.kz portaly arqyly jiberiledi. Al azamattyń ózi qujatty Enbek HR mobıldi qoldanbasynan kóre alady.
Densaýlyq saqtaý mınıstrligi azamattardy medıtsınalyq negizdersiz anyqtamalar men eńbekke ýaqytsha jaramsyzdyq paraqtaryn rásimdeýge kelispeýge, medıtsınalyq uıymdardyń zańdy jumys isteıtinin tekserýge jáne anyqtalǵan zańbuzýshylyqtar týraly quzyrly organdarǵa habarlaýǵa úndedi.
Eske salaıyq, buǵan deıin Qazaqstanda alaıaqtar ózin emhana qyzmetkeri retinde tanystyryp, jańa aldaý shemasyn qoldana bastaǵanyn habarlaǵanbyz.
