Almatydaǵy jedel veterınarlyq kómek: eki elik, bir úki jáne júzdegen úı janýary qutqaryldy

ALMATY. KAZINFORM – Almatyda pılottyq joba aıasynda táýlik boıy jumys isteıtin mobıldi brıgadalar 200-den astam janýarǵa kómek kórsetti. Itter men mysyqtardan bólek, mamandar jylqy, esek, tipti úkini de emdegen.

Almaty ákimdiginiń habarlaýynsha, qalada iske qosylǵan jańa qyzmet janýarlardy qutqarýǵa úles qosyp jatyr.

«Almaty veterınarlyq qyzmeti» bastamasymen 18 aqpannan beri táýlik boıy jumys isteıtin eki mobıldi brıgada qıyn jaǵdaıǵa tap bolǵan janýarlarǵa alǵashqy veterınarlyq kómek kórsetip, buryn bosatylǵan janýarlarǵa qutyrýǵa qarsy qaıta ekpe egip jatyr.

– Osy ýaqytqa deıin 223 janýarǵa kómek kórsetildi. Onyń ishinde 154 ıt, 64 mysyq, bir esek, bir jylqy, eki elik jáne bir úki bar. Sondaı-aq 1 259 ıtke qaıta ekpe egildi, - delingen habarlamada.

158 janýar tolyq saýyǵyp, óz mekenine jiberildi, al eki elik Almaty zoobaǵyna berildi.

Mamandardyń aıtýynsha, mundaı jumys janýarlardyń qaýipsizdigin qamtamasyz etip qana qoımaı, aýrýlardyń taralý qaýpin azaıtady.

Eske salaıyq, buǵan deıin Almatyda jedel veterınarııalyq kómek iske qosylǵanyn habarlaǵan edik.

Jedel veterınarııalyq kómekti shaqyrý úshin 8 708 595 64 04, 338 27 59 nómerlerine nemese Almatynyń biryńǵaı qyzmetine (109) habarlasý qajet.