Almatydaǵy jantúrshigerlik jol apaty: polıtsııa qyzmettik tekserýdi bastady
ALMATY. KAZINFORM — Birneshe kún buryn Ál-Farabı dańǵylynda eki avtokólik soqtyǵysyp, saldarynan úsh adam qaza tapty.
Almaty qalasy polıtsııa departamentiniń bastyǵy Aıdyn Qabduldınov halyqpen kezdesý kezinde rezonans týdyrǵan jol-kólik oqıǵasyna qatysty suraqqa jaýap berdi. Ol jol apaty boıynsha qylmystyq is qozǵalyp, sotqa deıingi tergeý amaldary júrgizilip jatqanyn aıtty.
— Zeekr avtokóliginiń júrgizýshisi qazirgi ýaqytta aýrýhanada jatyr. Aldaǵy ýaqytta oǵan qatysty tergeý áreketteri tolyq júrgizilip, júrgizýshi qamaýǵa alynady, — dedi polıtsııa bastyǵy.
Sondaı-aq Aıdyn Qabduldınov jol apatyna kóshe jarysynyń sebep bolǵany jáne oǵan polıtsııanyń joǵary laýazymdy tulǵasynyń qatysy týraly jelide taraǵan aqparattarǵa pikir bildirdi.
— Polıtsııa departamenti qyzmettik tergeý júrgizip jatyr, naqty quqyqtyq baǵa beriledi. Eger qyzmetkerlerdiń kinási anyqtalsa, eń qatań sharalardy qoldanamyz, — dedi ol.
Eske salaıyq, 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy. Bul bap boıynsha 10 jylǵa deıin bas bostandyǵynan aıyrý jazasy qarastyrylǵan.
Búgin Almaty polıtsııasy kóshedegi kólik jarystary týraly málimdeme jasady. Keıingi úsh táýlik ishinde qala joldarynda 5 myńnan astam jol qozǵalysy erejesin buzý deregi anyqtalǵan.
