Almatydaǵy jantúrshigerlik jol apaty: taıaýda is materıaldary tanysýǵa joldanady
ASTANA. KAZINFORM – Іshki ister mınıstriniń orynbasary Sanjar Ádilov Almatyda adam ólimine ákelgen jol-kólik oqıǵasyn tergeýge qatysty pikir bildirdi.
- Almatydaǵy apat boıynsha isti tergeý aıaqtalýǵa jaqyn. Taıaý kúnde is materıaldaryn aldymen zardap shekken tarapqa, odan keıin kúdikti men onyń qorǵaýshylaryna tapsyramyz, - dedi Sanjar Ádilov Parlament Májilisinde tilshiler suraǵyna jaýap bere otyryp.
Eske salaıyq, 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy. Bul bap boıynsha 10 jylǵa deıin bas bostandyǵynan aıyrý jazasy qarastyrylǵan.
Іshki ister mınıstri Erjan Sadenov Almatydaǵy jol apatynan keıin birqatar basshy qyzmetinen bosatylǵanyn málimdedi.
