Almatydaǵy jańa stadıon qurylysynyń qashan aıaqtalatyny belgili boldy
ALMATY. KAZINFORM – Almaty máslıhatynyń kezekti sessııasynda megapolıstegi iri ınfraqurylymdyq jobalar talqylandy.
Sessııasy barysynda depýtat Elena Te qala ákiminiń orynbasary Beıbit Shahanovqa suraq qoıyp, odan «Medeý» muz aıdynyn jańǵyrtýǵa jáne jańa stadıon qurylysyna qatysty máselelerdiń bar-joǵyn surady. Óz jaýabynda Beıbit Shahanov bul jobalardyń tek Almaty úshin ǵana emes, búkil el úshin mańyzy zor ekenin atap ótti.
— Ónerkásip jáne qurylys mınıstriniń buıryǵymen bul stadıon biregeı nysandar qataryna jatqyzyldy. Jobany júzege asyrý úshin Qurylys isteri komıteti bekitken jeke jospar bar, biz sonyń negizinde jumys istep jatyrmyz. Aldaǵy ýaqytta bul stadıonda eýropalyq deńgeıdegi iri týrnırlerdi ótkizýge ótinim bere alýymyz úshin jobany Qazaqstan fýtbol federatsııasymen, ÝEFA-men jáne ózimizdiń «Qaırat» fýtbol klýbymen kelisip jatyrmyz. Biraq bizdiń óńirde seısmıkalyq qaýiptiń joǵary ekenin eskerý qajet. Stadıon salynyp jatqan ýchaske 10 baldyq aımaqqa jatady. Sondyqtan bul jobany Qazaq qurylys jáne sáýlet ǵylymı-zertteý jáne jobalaý ınstıtýtymen birlese muqııat pysyqtap jatyrmyz. Dál qazirgi ýaqytta synaq qadalaryn qaǵý jumystary júrip jatyr. Osy synaqtar aıaqtalǵannan keıin irgetas quıý jumystaryn jalǵastyramyz. Bul — óte mańyzdy joba ári erekshe baqylaýda tur. Aldyn ala boljam boıynsha qurylysty 2028 jyldyń naýryz aıynda aıaqtaýdy josparlap otyrmyz, — dedi ol.
Sonymen qatar Beıbit Shahanov «Medeý» muz aıdyny tarıhı jáne sáýlet eskertkishi tiziminde ekenin atap ótti.
-Sol sebepti joba Mádenıet mınıstrligimen jáne «Qazqaıtajańartý» mekemesimen kelisiledi. Qazirgi ýaqytta qajetti ǵylymı saraptamalardy alý boıynsha jumystar júrgizilip jatyr. — 2027–2028 jyldardyń maýsymyna qaraı «Medeý» muz aıdyny qonaqtar men týrısterdi qabyldaı bastaıdy dep boljap otyrmyz, — dedi ákimniń orynbasary.
Eske salaıyq, buǵan deıin Almaty ákimdigi UEFA-nyń IV sanat talaptaryna sáıkes Qulja tas jolynda salynatyn 45 myń oryndyq stadıon qurylysy 2027 jyldyń IV toqsanynda aıaqtalatynyn habarlaǵan edi.
