Almatydaǵy vızıt-ortalyqtar jańa formatqa aýysýy múmkin
ALMATY. KAZINFORM – Almatyda 2025 jylǵy týrızm salasynyń negizgi kórsetkishterine arnalǵan baspasóz-konferentsııasy ótti.
Іs-shara barysynda qalalyq týrızm basqarmasynyń basshysy Ǵalııa Toqseıitova qaladaǵy vızıt-ortalyqtardyń jańa formatqa aýysýy múmkin ekenin aıtty. Onyń sózinshe, qazir bul nysandardyń týrısterge kórsetetin qyzmeti shekteýli.
– Aqparattyq ortalyqtar moraldyq turǵydan eskirgen. Basty másele — zańnamalyq shekteýlerde. Memlekettik organ retinde biz aqyly qyzmet kórsete almaımyz. Al vızıt-ortalyqqa kelgen týrıster eń aldymen daıyn týrdy satyp alǵysy keledi. Sondyqtan qazir ınvestorlarmen jumys istep jatyrmyz. Maqsatymyz — tek aqyl-keńes pen baǵyt-baǵdar beretin eski formattan halyqaralyq deńgeıdegi aqparattyq ortalyqtarǵa aýysý. Sonda saıahatshy keńes alyp qana qoımaı, birden týrlardy satyp ala alady, - dedi vedomstvo basshysy.
Eske salaıyq, birneshe kún buryn Butaqty shatqalynda «Butaqty» vızıt-ortalyǵy ashyldy. Vızıt-ortalyq aýmaǵynda zamanaýı sanıtarlyq-gıgıenalyq toraptar, tamaqtaný orny, tımbıldıng pen sheberlik sabaqtaryn ótkizýge arnalǵan alańdar, sondaı-aq mektep oqýshylary men túrli toptarǵa arnalǵan ashyq aspan astyndaǵy bilim berý jáne mádenı is-sharalar ótetin oryndar qarastyrylǵan.
Buǵan deıin Premer-mınıstr Oljas Bektenov Senat depýtattarynyń saýalyna bergen jaýabynda elimizdiń qaı óńirlerinde týrıstik vızıt-ortalyqtary salynatynyn aıtty.