Almatydaǵy «vafel» tańbasy: ereje buzǵandarǵa aıyppul qaı ýaqyttan salyna bastaıdy

ALMATY. KAZINFORM — Almatyda 22 qarashadan bastap «vafeldi» tańba boıynsha talapty buzǵan júrgizýshilerge aıyppul salyna bastaıdy.

Qalalyq ákimdik málimetinshe, memlekettik-jekeshelik áriptestik jobasyn iske asyrý aıasynda mundaı tańba salynǵan qıylystarǵa qosymsha 43 kamera ornatylǵan. 25 qazannan bastap Ákimshilik quqyqbuzýshylyq týraly kodeksiniń 594-babynda («Jol qıylystarynan ótý qaǵıdalaryn buzý nemese joldyń júrý bóligin kesip ótý») kózdelgen quqyqbuzýshylyqtardy avtomatty túrde tirkeýdiń pılottyq jobasy bastalǵan. Synaq merzimi kezinde osyndaı myńnan astam derek anyqtalǵan.

22 qarashaǵa deıin keshenderdiń jumys algorıtmderin retteý júrgizilip jatyr. Munyń maqsaty – zańbuzýshylyqtardy dál anyqtaý jáne qatelesip salynatyn aıyppuldardyń aldyn alý.

— Aralyq nátıjelerge súıensek, Ákimshilik quqyqbuzýshylyq týraly kodeksiniń 594-baby boıynsha avtomatty tirkeý jáne derekterdi Ákimshilik óndiristerdiń biryńǵaı tizilimi Protsessıng ortalyǵyna jiberý jol qozǵalysy qatysýshylarynyń tártibin kúsheıtip, qıylystardaǵy keptelisti azaıtady, - dep habarlady ákimdik.

Sonymen birge «Sergek» keshenin resmı túrde iske qosý jáne ony Ákimshilik óndiristerdiń biryńǵaı tizilimimen biriktirý úshin tekserý júrgizilip jatyr. Osy aptada bes qıylys tolyq daıyn bolady, qalǵany aıdyń sońyna deıin aıaqtalady.

Eske salaıyq, Almatyda alǵashqy «vafeldi» tańba 2019 jyly paıda bolǵan edi. Sol kezde tájirıbe retinde eki qıylysta salynǵan. Keıin bul bastama toqtaǵanymen, 2025 jyly joba qaıta jandandy. Qazir mundaı jol tańbasy qalanyń 10 kóshe qıylysynda bar.

Almaty polıtsııa departamentiniń málimetinshe, 2019 jyly jol qozǵalysy erejelerinde mundaı tańbaǵa qatysty naqty norma bolmaǵan. Al búginde ol resmı túrde bekitilip, «vafeldi» tańbamen belgilengen, biraq bos emes qıylystarǵa shyǵý quqyqbuzýshylyq bolyp esepteledi.