Almatydaǵy úzdik mektepke 56 mln teńge berildi

Almatyda muǵalimder kúnine arnalǵan saltanatty jıynda «Úzdik bilim berý uıymy» baıqaýynyń jeńimpazy marapattaldy, dep habarlaıdy QazAqparat tilshisi.

S.A.Qojyqov atyndaǵy №39 mamandandyrylǵan lıtseıi «Eń úzdik orta bilim berý mekemesi» dep tanylyp, ujym 56 mıllıon teńge kólemindegi ákim grantyn ıelendi.
Atalǵan qarjy mektepti materıaldy-tehnıkalyq jabdyqtaýǵa jumsalmaq.

Baıqaý komıssııasynyń quramyna qala ákiminiń orynbasary, Bilim basqarmasynyń ókilderi, bilim berý ardagerleri, respýblıkalyq bilim berý uıymdarynyń, qoǵamdyq uıymdardyń dırektorlary jáne t.b. kirdi.

Baıqaý eki kezeńde ótkizildi: aýdandyq kezeń – 26 sáýirden 5 mamyrǵa deıin jáne qalalyq kezeń – 10 mamyrdan 30 maýsymǵa deıin.

Birinshi kezeńde aýdandardan segiz orta bilim berý uıymy usynyldy. Olardyń ishinde: Alataý aýdanynyń №180 jalpy bilim beretin mektebi; Alataý aýdanynyń № 201 mektep-gımnazııasy; Almaly aýdanynyń S.A.Qojyqov atyndaǵy №39 mamandandyrylǵan lıtseıi; Áýezov aýdanynyń A.Baıtursynov atyndaǵy №139 mektep-gımnazııasy; Bostandyq aýdanynyń Mahatma Gandı atyndaǵy №92 mamandandyrylǵan lıtseıi; Jetisý aýdanynyń Súıinbaı atyndaǵy № 143 mektep-lıtseıi; Naýryzbaı aýdanynyń №174 mektep-gımnazııasy; Túrksib aýdanynyń №198 jalpy bilim beretin mektebi.

Jeńimpaz birneshe krıterıı boıynsha tańdaldy. Olardyń ishinde: tehnologııalardy oqý úderisine engize bilý, muǵalimderdiń ózin-ózi júzege asyrýyna jaǵdaıdyń bolýy jáne oqýshylardyń oqýda joǵary kórsetkishteri eskerildi.