Almatydaǵy úsh týrıstik nysan álemniń úzdik baǵyttary qataryna endi
ALMATY. KAZINFORM – Almatydaǵy Kimasar jáne Butaqty shatqaldary men Shymbulak aspaly joly 2026 jylǵy halyqaralyq The Worldworthy 100 reıtıngine enip, álemdegi úzdik týrıstik baǵyttar qatarynan kórindi.
Halyqaralyq reıtıng qorytyndysy boıynsha Kimasar shatqaly álemdegi eń úzdik 100 jaıaý serýendeý baǵyty arasynda 56-orynǵa turaqtady. Al Butaqty shatqaly osy sanatta 79-orynǵa ıe boldy.
Shymbulak aspaly joly álemdegi úzdik aspaly joldar reıtınginde 9-oryn alyp, alǵashqy ondyqqa endi.
Úsh týrıstik nysan da The Worldworthy 100 reıtınginiń laýreaty sertıfıkatyn ıelendi. Bul Almatynyń taýly aımaqtaryna halyqaralyq deńgeıde qyzyǵýshylyqtyń joǵary ekenin kórsetedi.
The Worldworthy 100 – álemniń kórnekti týrıstik oryndaryn saralaıtyn halyqaralyq redaktsııalyq reıtıng. Ony ázirleý barysynda saıahatshylardyń pikiri, halyqaralyq buqaralyq aqparat quraldaryndaǵy jarııalanymdar, týrıstik gıdterdiń usynymdary men ashyq derekkózderdegi aqparattar eskeriledi.
Almaty taýlary jyl saıyn mıllıondaǵan týrısti qabyldaıdy. 2026 jyldyń qańtar-qazan aılary aralyǵynda Іle Alataýy memlekettik ulttyq tabıǵı saıabaǵyna 1,6 mıllıonnan astam adam barǵan.
Mastercard derekterine sáıkes, 2025 jyly Shymbulak sheteldik týrıster arasynda Almatynyń eń tanymal týrıstik orny atandy. Qaladaǵy týrıstik nysandarǵa jasalǵan sheteldik saparlardyń 30,62%-y osy baǵytqa tıesili bolǵan.
– Almatynyń birden úsh taýly týrıstik nysanynyń álemdik úzdik júzdikke enýi – qalamyzdyń týrıstik áleýetiniń joǵary baǵalanǵanyn kórsetetin mańyzdy jetistik. Búginde Almaty saıahatshylardy tabıǵatynyń kórkemdigimen ǵana emes, belsendi demalysqa arnalǵan san alýan múmkindigimen de qyzyqtyrady. Qala ákimi Darhan Satybaldynyń tapsyrmasy aıasynda qoljetimdilik pen qaýipsizdikke, biregeı tabıǵatty saqtaýǵa erekshe nazar aýdara otyryp, taý týrızmin damytýdy jalǵastyramyz, – dedi Almaty qalasy Týrızm basqarmasynyń ókilderi.
Vedomstvo málimetinshe, Almaty taý klasteri jobasyn júzege asyrý týrıstik ınfraqurylymdy damytýǵa jańa múmkindikter ashady.
Joba aıasynda aspaly jol jelisin keńeıtý, qoldanystaǵy ınfraqurylymdy jańǵyrtý jáne jyl boıy demalýǵa arnalǵan jańa múmkindikter jasaý kózdelgen.
Almatydaǵy úsh birdeı taýly týrıstik nysannyń halyqaralyq deńgeıde joǵary baǵalanýy qalanyń Ortalyq Azııadaǵy tabıǵat aıasynda demalý jáne belsendi týrızm boıynsha jetekshi baǵyttardyń biri retindegi ornyn nyǵaıta túsedi.
Aıta keteıik, buǵan deıin Almatydaǵy taý klasteri jobasynyń qurylysyna daıyndyq bastalǵan bolatyn. Joba aıasynda «Shymbulaq» kýrortynda jańa kótergishter salynyp, Butaqty jáne Kimasar shatqaldarynda ınfraqurylymdy damytý jumystary qolǵa alyndy.