Almatydaǵy Ýrologııa ǵylymı ortalyǵynyń mártebesi qaıta qaralýy múmkin

Densaýlyq saqtaý mınıstrligi ózine qarasty 37 uıymnyń ǵylymı nátıjeliligine aýqymdy baǵalaý júrgizýdi aıaqtady. Bul jumys Joǵary aýdıtorlyq palatanyń nusqamasy boıynsha júrgizildi. Eki mekeme boıynsha naqty sheshim qabyldanyp, qalǵan uıymdarǵa kórsetkishterdi jaqsartý jóninde tapsyrmalar berildi. Bul jumysqa Joǵary aýdıtorlyq palata 2025 jyly júrgizgen memlekettik aýdıt negiz boldy. 

Tekserý qorytyndysy boıynsha Densaýlyq saqtaý mınıstrligine sala uıymdarynyń ǵylymı, ǵylymı-tehnıkalyq jáne ınnovatsııalyq qyzmetine egjeı-tegjeıli taldaý júrgizip, shara qabyldaý tapsyryldy.

2025 jyly júrgizilgen keshendi baǵalaý 37 uıymdy qamtydy: klınıkalyq beıindegi 19 ǵylymı-zertteý ınstıtýty men ǵylymı ortalyq, klınıkalyq emes beıindegi 10 ǵylymı uıym, sondaı-aq joǵary jáne joǵary oqý ornynan keıingi bilim beretin 8 medıtsınalyq uıym boldy. Mekemeler ǵylymı zertteýlerden túsetin kirister kólemi, jarııalanym belsendiligi, ǵylymı jumystardan dáıeksóz keltirý kórsetkishi, patentterdiń bar-joǵy, zertteý nátıjelerin kommertsııalandyrý deńgeıi men ınnovatsııalyq qyzmet, sondaı-aq halyqaralyq ǵylymı is-sharalarǵa qatysý deńgeıi boıynsha baǵalandy.

Taldaý nátıjeleri Densaýlyq saqtaý mınıstrliginiń Ǵylymı-tehnıkalyq keńesi men QR Prezıdenti janyndaǵy Ulttyq ǵylym akademııasynyń birlesken otyrysynda qaraldy. Nátıjesinde belgilengen talaptarǵa sáıkes kelmeý táýekelderi bar uıymdar boıynsha naqty sheshimder qabyldandy.

— Transfýzıologııa ǵylymı-óndiristik ortalyǵynyń ǵylymı uıym mártebesin saqtap qalý usynyldy. Bul transfýzıologııa jáne qan qyzmeti salasynda respýblıkalyq deńgeıdegi jalǵyz mamandandyrylǵan uıym ári salany ǵylymı-ádistemelik súıemeldeýdi qamtamasyz etedi. Sonymen qatar Ortalyqtyń jumys ereksheligin eskere otyryp, ǵylymı jáne ınnovatsııalyq qyzmetten túsetin kirister úlesi boıynsha qoldanylatyn ındıkatordy qaıta qaraý týraly sheshim qabyldandy. Eń tómen nátıje kórsetip, jekelegen talaptardyń oryndalýyn qamtamasyz etpegen «B. O. Jarbosynov atyndaǵy Ýrologııa ǵylymı ortalyǵy» AQ-ǵa qatysty belgilengen ındıkatorlarǵa qol jetkizý úshin shuǵyl sharalar qabyldaý týraly sheshim qabyldandy. Eger 2026 jyldyń qorytyndysy boıynsha nátıjeler qanaǵattanarlyqsyz bolyp qalsa, uıymnyń ǵylymı uıym retindegi mártebesi qaıta qaralady, — delingen habarlamada.

Sonymen qatar ǵylymı-zertteý ınstıtýttarynyń, ǵylymı ortalyqtar men medıtsınalyq joǵary oqý oryndarynyń birinshi basshylaryna: otandyq jáne sheteldik ǵylymı granttardy tartýdy kúsheıtý; halyqaralyq kóportalyqty klınıkalyq zertteýlerge belsendi qatysý; ulttyq jáne halyqaralyq patentter alýdy arttyrý; ǵylymı nátıjelerdi kommertsııalandyrýdy damytý; ǵylymı jáne synaq zerthanalaryn, bıobankterdi, tehnoparkterdi jáne ǵylym boıynsha jobalyq ofısterdi qosa alǵanda, ınfraqurylymdy odan ári damytý tapsyryldy.

Júıeli monıtorıng júrgizý jáne aldaǵy baǵalaýlardyń obektıvtiligin qamtamasyz etý úshin S. Qaıyrbekova atyndaǵy Ulttyq densaýlyq saqtaýdy damytý ǵylymı ortalyǵyna ǴZI, ǵylymı ortalyqtar men medıtsınalyq joǵary oqý oryndarynyń ǵylymı qyzmeti týraly derekterdi jınaýǵa, taldaýǵa jáne valıdatsııalaýǵa arnalǵan tsıfrlyq platforma qurý máselesin pysyqtaý usynyldy.

Sonymen qatar ǵylymı uıym mártebesin berý jáne qaıta qaraý qaǵıdalary jańartyldy: sharttar naqtylanyp, nátıjelilikti baǵalaýdyń barynsha aıqyn ólshemsharttary engizildi, zertteýlerdi baǵalaý rásimi jetildirildi, al qaǵıdalar ulttyq talaptar men halyqaralyq standarttarǵa sáıkes keltirildi. Osylaısha, densaýlyq saqtaý uıymdarynyń ǵylymı qyzmetine aýqymdy baǵalaý tolyq kólemde júrgizildi. 

Uıymdardyń ǵylymı uıym mártebesin saqtaýynyń negizdiligi qaraldy. Nátıjesinde basqarýshylyq sheshimder qabyldanyp, jekelegen mekemelerdiń qyzmetin belgilengen talaptarǵa sáıkes keltirý jónindegi sharalar aıqyndaldy. Joǵary aýdıtorlyq palatanyń qalǵan nusqamalarynyń oryndalýy baqylaýda.

Osyǵan deıin Joǵary aýdıtorlyq palata Qorǵanys mınıstrliginiń bıýdjetin tekserýdi bastaǵanyn jazǵanbyz.