Almatydaǵy Ulttyq ortalyq mýzeıin jańǵyrtý jumystary aıaqtaldy
ASTANA. KAZINFORM - Almaty qalasynda Qazaqstan Respýblıkasynyń Ulttyq ortalyq mýzeıindegi jeldetý jáne aýa baptaý júıesin jańǵyrtý jumystary aıaqtaldy.
QR Mádenıet mınıstrligi baspasóz qyzmetiniń habarlaýynsha, joba Memleket basshysynyń tarıhı-mádenı murany saqtaý jáne mýzeılerdiń materıaldyq-tehnıkalyq bazasyn nyǵaıtý jónindegi tapsyrmalaryn iske asyrý aıasynda júzege asyryldy.
Ortalyq Azııadaǵy eń iri mýzeılerdiń biri sanalatyn mekeme úshin ınjenerlik júıelerdi jańartý aıryqsha mańyzdy. Búginde Ulttyq ortalyq mýzeı qorynda arheologııalyq jádigerler, qoljazbalar, qujattar, óner týyndylary men Qazaqstan tarıhynan syr shertetin ózge de qundy muralardy qosa alǵanda 300 myńnan astam eksponat saqtaýly.
Zamanaýı jeldetý jáne aýa baptaý júıesi mýzeı qoryndaǵy jádigerlerdi saqtaý jaǵdaıyn jaqsartýǵa, ekspozıtsııalyq jumystyń sapasyn arttyrýǵa jáne kelýshilerge, zertteýshiler men mýzeı mamandaryna qolaıly orta qalyptastyrýǵa múmkindik beredi. Jobany júzege asyrý úshin arnaıy merdiger uıym tartylyp, qajetti jabdyqtar eýropalyq óndirýshiden tikeleı satyp alyndy.
Joba Bolat Ótemuratov qorynyń qoldaýymen júzege asyryldy. Jumystar 2025 jyldyń qyrkúıeginde bastalyp, 2026 jylǵy 20 mamyrda tolyq aıaqtaldy.
Aıta keteıik, búginde elimizde 286 mýzeı jumys isteıdi. Olardyń qorynda 4,5 mıllıonnan astam jádiger saqtalǵan, al mýzeılerge jyl saıyn 6,5 mıllıonnan astam adam keledi.
