Almatydaǵy Tuńǵysh Prezıdent saıabaǵynan aýrý taratatyn kene tabyldy
ALMATY. KAZINFORM — Almatyda epıdemıologııalyq maýsym bastalǵaly beri kene shaqqan 2 023 adam kómekke júgingen. Bul byltyrǵy osy ýaqytpen salystyrǵanda 11% kóp. Zardap shekkenderdiń jartysyna jýyǵy — 14 jasqa deıingi balalar.
Qalada osyndaı eki oqıǵa tirkelgen, naýqastyń ekeýi de vaktsına almaǵan. Bul týraly Almatydaǵy sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova aıtty.
Onyń sózinshe, kene shaqqan adam alǵash ret naýryz aıynyń basynda tirkelipti. Almatynyń mańy ıksod kenesi keń taraǵan endemııalyq aýmaqqa jatady, olar kene entsefalıti men kene borrelıozyn tasymaldaıtyndyqtan qaýipti bolyp sanalady.
— Bıyl kene shaqqandardy byltyrǵy epıdemıologııalyq maýsymmen salystyrǵanda erterek tirkeı bastadyq. Bul kúnniń erte jylynyp, kenelerdiń belsendi bola bastaýymen baılanysty. Dárigerge júgingenderdiń sany artqanyna qaramastan, jalpy kórsetkish kópjyldyq ortasha deńgeıden aspaıdy. Jaǵdaıdy qazir úzbeı baqylap otyrmyz, — dedi Ásel Qalyqova Óńirlik kommýnıkatsııalar qyzmetinde ótken brıfıng kezinde.
Almatyda kenege qarsy óńdeý jumysy jalǵasyp jatyr. Dezınsektsııanyń birinshi kezeńi 26 naýryz ben 30 sáýir aralyǵynda ótip, 2 366 gektardan astam aýmaqty qamtyǵan. Oǵan orman alqaby, qalalyq saıabaqtar men alańqaılar kirdi. Ekinshi kezeń 6 mamyrda bastaldy. 17 mamyrǵa deıin 661 gektardan astam aýmaq óńdelgen, bul — jalpy jospardyń shamamen 28%-y.
Eń úlken aýmaq Medeý aýdanynda. Munda shamamen 1 469 gektar jerdi qamtý josparlanǵan, onyń ishinde Medeý, Býtakovka, Kólsaı, Sulýsaı shatqaly men basqa da tabıǵı aımaqtar bar. Bostandyq aýdanynda Alma-Arasan shatqaly men qalalyq saıabaqtardyń aýmaǵynda kenege qarsy jumys júrgizilip jatyr. Alataý, Almaly, Áýezov, Bostandyq, Medeý, Naýryzbaı men Túrksib aýdanyndaǵy saıabaqtar men alańqaılardy óńdeýdi tolyq aıaqtap bitipti.
Maýsym boıy mamandar tórt baǵytta — Býtakovka, Medeý, Alma-Arasan men Qaraǵaıly shatqalynda entomologııalyq baqylaý júrgizedi. Maýsym bastalǵaly beri 41 kene ustalypty. Bireýi Tuńǵysh Prezıdent saıabaǵynyń aýmaǵynan tabylǵan. Ulttyq saraptama ortalyǵynyń bólimshesiniń zerthanasy da 187 keneni zerttegen, onyń ishinde adamdardan alynǵandary da bar eken. Solardyń ishindegi tórt kene aýrý taratatyndar bolyp shyqty.
Departament mamandary kene shaqqan jaǵdaıda tórt kúnnen asyrmaı medıtsınalyq kómekke júginý qajet ekenin eske saldy. Almatyda shuǵyl kómek kórsetetin bes travmatologııalyq pýnkt jumys isteıdi, olardyń qatarynda Balalar shuǵyl medıtsınalyq kómek ortalyǵy da bar.
Mamandar vaktsınatsııany aldyn alýdyń eń tıimdi joly dep otyr. 18 mamyrdaǵy málimet boıynsha, kene entsefalıtine qarsy 2 381 adam vaktsına alǵan. Qaladaǵy medıtsınalyq uıymdarda belgııalyq óndiristegi «TıkoVak» vaktsınasynyń 8 myńnan astam dozasy bar.
Eske salaıyq, buǵan deıin QR DSM sanıtarııalyq-epıdemıologııalyq baqylaý komıtetiniń bas sarapshysy Araı Zekenova qazir kene shaǵý Almaty oblysy men Almaty qalasynda órship turǵanyn aıtqan edi.
