Almatydaǵy Tuńǵysh Prezıdent saıabaǵy qaıta jańartý jumystary kezinde jabyla ma
ALMATY. KAZINFORM – Almatyda eń iri ári adam eń kóp baratyn qoǵamdyq keńistikterdiń biri – Tuńǵysh Prezıdent saıabaǵyn keshendi qaıta jańartý jumystary bastalady.
Qurylys jumystary búkil aýmaqty tolyq jappaı, kezeń-kezeńimen júrgiziledi. Alǵashqy kezeńde negizgi jumystar bastalatyn saıabaqtyń ońtústik bóligi ýaqytsha jabylady. Al ortalyq bólikten kireberis arkaǵa deıingi aýmaq kelýshiler úshin ashyq bolyp qalady.
Birinshi kezeń aıaqtalǵan soń jańartylǵan bólik qaıta ashylyp, jumys kelesi aýmaqta jalǵasady. Osylaısha, qaıta jańartý barysyna qaraı saıabaqtyń jekelegen aımaqtary kezeń-kezeńimen paıdalanýǵa beriledi.
Qoǵamdyq keńistikterdi damytý basqarmasynyń ókilderiniń habarlaýynsha, qaıta jańartý jobasy tabıǵı landshaftty, sáýlettik sheshimderdi jáne demalysqa, serýendeýge, belsendi ómir saltyna arnalǵan qolaıly ınfraqurylymdy úılestiretin zamanaýı, jaıly ári kópfýnktsııaly orta qurýǵa baǵyttalǵan. Saıabaq 2010 jyly ashylǵannan beri aýmaqta kúrdeli jańartý júrgizilmegen. Qazir ınfraqurylymnyń bir bóligi zamanaýı jaılylyq pen fýnktsıonaldyq talaptarǵa saı júıeli jańartýdy qajet etedi.
Saıabaq Bostandyq aýdanynda, ál-Farabı dańǵyly men Dýlatı kóshesiniń boıynda, Іle Alataýynyń baýraıynda ornalasqan. Jalpy aýmaǵy – 62,4 gektar. Keńistikte ortalyq alleıa, sýburqaqtar kesheni, amfıteatr, serýen aımaqtary men velojoldar, sondaı-aq taýǵa panoramalyq kórinis ashylatyn demalys oryndary bar.
– Qaıta jańartý barysynda tabıǵı ortany saqtaý, jasyl jelek qoryn damytý jáne kelýshilerdiń barlyq sanaty úshin qolaıly ınfraqurylym qurýǵa basymdyq beriledi. Joba aıasynda kireberis aımaǵy jańartylyp, júrginshiler baǵyty kóriktendiriledi, demalys oryndary jańaryp, jańa fýnktsıonaldyq keńistikter jasaqtalady.
Jańartý tujyrymdamasy brıtanııalyq landshaft sáýletshileriniń jáne el mamandarynyń qatysýymen ázirlenip, kórkeıtýdiń úzdik halyqaralyq tájirıbesine negizdelgen. Negizgi maqsat – tabıǵat, sáýlet jáne zamanaýı demalys, qarym-qatynas pen qalalyq is-sharalarǵa arnalǵan múmkindikter úılesim tapqan saıabaq qalyptastyrý, - delingen habarlamada.
Eske salaıyq, buǵan deıin Almatyda bıyl qandaı jańa saıabaq salynatynyn jazǵanbyz.