Almatydaǵy Tuńǵysh Prezıdent saıabaǵy demeýshiler esebinen jańartylady
ALMATY. KAZINFORM — Almatynyń eń iri demalys aımaqtarynyń biri — Tuńǵysh Prezıdent saıabaǵy kelesi jyly qaıta jańǵyrtýdan ótedi.
Almaty ákimdiginiń baspasóz qyzmeti Kazinform agenttiginiń resmı saýalyna jaýap berip, saıabaqty jańartý jumystaryna qatysty keıingi málimetterdi usyndy.
Búginde saıabaq aýmaǵyn jańartý boıynsha master-jospar men jobalyq-smetalyq qujattama ázirleý josparlanyp otyr. Joba aıasynda fontan kesheni men kireberis arkasy, sondaı-aq olarǵa tıesili tehnıkalyq úı-jaılar kúrdeli jóndeýden ótetini belgili boldy.
— Jańa master-josparda zamanaýı tásilder men sáýlettik-josparlaý sheshimderi qoldanylady. Joba keshendi formatta júzege asyrylady — áýeli jobalyq qujattama daıyndalyp, keıin qurylys-montaj jumystary júrgiziledi, — delingen ákimdiktiń resmı jaýabynda.
Qala ákimdiginiń málimetinshe, qaıta jańartý jumystary demeýshilik qarajat esebinen júzege asyrylady.
Qurylys-montaj kezeńi 2026 jylǵa josparlanǵan.
— Barlyq jumys aıaqtalǵan soń fontan kesheni óz jumysyn jalǵastyra beredi, — dep naqtylady ákimdik.
Tuńǵysh Prezıdent saıabaǵy — Almatynyń eń tanymal jáne keń aýqymdy demalys aımaqtarynyń biri. 2010 jyly ashylǵan saıabaq Bostandyq aýdanynda, ál-Farabı dańǵyly men Navoı kóshesiniń qıylysynda ornalasqan.
Saıabaqtyń jalpy aýmaǵy — shamamen 73 gektar. Munda fontan kesheni, sándik gúlzarlar, serýen joldary, sport jáne balalar alańdary ornalasqan. Keshenniń basty sáýlettik elementi — doǵa pishinindegi kireberis arka men odan ashylatyn qalanyń keń panoramasy.
Aıta keteıik, buǵan deıin Almaty ákimi Tuńǵysh Prezıdent saıabaǵynyń keshendi qaıta jańǵyrtý jobasymen tanysqan edi.
Sol kezde qazir qoldanystaǵy avtomatty sýarý júıesi tek jartylaı jumys istep turǵany, sondyqtan ony tolyq jańǵyrtý qajet ekeni aıtylǵan. Sol sebepti zamanaýı tehnologııany qoldanyp, sý aǵyzý qubyrlaryn tazartyp, sýarý júıesin tolyq jańartý josparlanyp otyr.
Eske salaıyq, buǵan deıin Almatydaǵy Baıtursynov skverin ákimdik emes, jeke ınvestor jóndeıtini belgili bolǵan edi.