Almatydaǵy «Terrenkýrdy» jańǵyrtý jumystary qashan aıaqtalady
ALMATY. KAZINFORM – Almatyda «Terrenkýrdy» modernızatsııalaý osy jyldyń sáýir aıynda aıaqtalady.
Erbolat Dosaevtyń aıtýynsha, Almatyda qoǵamdyq keńistikterdi damytý boıynsha júıeli jumys jalǵasyp keledi.
– Medeý aýdany turǵyndarynyń demalysy men tynyǵýyna qolaıly jaǵdaı jasaý úshin 2025 jyldyń sáýir aıynda «Terrenkýr» aýmaǵynyń 3,4 gektaryn jańǵyrtý jobasy aıaqtalady. Joba toǵandy abattandyrýdy, rekreatsııalyq aımaqtardy, balalar men sport alańdaryn salýdy qamtıdy, – dedi qala ákimi.
Sondaı-aq ákim 2025 jyldyń mamyr aıynda Qurmanǵazy kóshesinen ál-Farabı dańǵylyna deıin Dostyq dańǵylynyń «qasbten qasbetke deıin» jáne Raıymbek batyr dańǵylynan Gogol kóshesine deıin Pýshkın kóshesin keshendi abattandyrý boıynsha aýqymdy jumystar bastalatynyn aıtty.
– Osy jobalar aıasynda jol jabyny jańartylady, velojoldar, sporttyq jáne serýendeý aımaqtary jabdyqtalady, sondaı-aq aýmaqty keshendi kógaldandyrý júrgiziledi. Qurylys-montaj jumystaryn aıaqtaý merzimi aǵymdaǵy jyldyń sońyna josparlanǵan, – dedi ol.
Eske salaıyq, buǵan deıin 20 jyldan astam ýaqyt boıy jóndeý júrgizilmegen Terrenkýrdyń abattandyrylatyny týraly jazǵanbyz.
2023 jyly Terrenkýrdaǵy sý qoımasynyń joǵary bóligi memleket menshigine qaıtarylǵan bolatyn.