Almatydaǵy tergeý ızolıatorynan taǵy bir qaraqalpaq belsendisi bosatyldy
Búgin Almatydaǵy tergeý ızolıatorynan taǵy bir qaraqalpaq belsendisi Zıýar Mırmanbetova bosatyldy, dep habarlaıdy QazAqparat elimizdegi qaraqalpaq dıasporasynyń ókili Aqylbek Muratbaıdyń Twitter-degi paraqshasyna silteme jasap.
"Zıýar Mırmanbetova bir jyl buryn Ózbekstan polıtsııasy men arnaıy qyzmetiniń qatysýymen Qazaqstan aýmaǵynda ustalǵan bolatyn. Jalpy, Tashkenttiń suraýy boıynsha shetelde qaraqalpaq dıasporasynyń 5 ókili tutqyndaldy. Solardyń biri Tileýbıke ıÝldasheva áli Aqtóbedegi tergeý ızolıatorynda otyr", - dep jazdy Aqylbek Muratbaı.
Onyń sózinshe, qaraqalpaqtardy qýdalaý 2022 jyldyń shilde aıynda Qaraqalpaqstandaǵy beıbit sherýge oq atýdan keıin bastalǵan.
"Onda ondaǵan (keıbir derekter boıynsha júzdegen) adam qaza tapty. Birqansha jýrnalıster, zańgerler, blogerler men azamattyq belsendiler uzaq merzimge túrmege qamaldy", - deıdi qaraqalpaq dıasporasynyń ókili.
Bul oqıǵalardy tekserý úshin prezıdent Mırzıeev memlekettik komıssııa qurdy. Alaıda ol uıym jumys istep bastaǵaly bergi 15 aı ishinde eshbir esep jarııalamaǵan.
16 qyrkúıek kúni túnde Almatydaǵy tergeý ızolıatorynan taǵy bir belsendi – Raısa Qudaıbergenova bosatylǵanyn jazǵan edik.
Raısa Qudaıbergenova – qamaýdan bosatylǵan úshinshi belsendi. Odan buryn Qazaqstannyń ońtústik astanasyndaǵy tergeý ızolıatorynan Qoshqarbaı Tóremuratov pen Jangeldi Jaqsymbetov bosatylǵanyn jazǵan bolatynbyz.
⚡ Another Karakalpak activist Ziuar Mirmanbetova was released from the Almaty pre-trial detention center today. A year ago, she was detained on the territory of #Kazakhstan with the participation of the police and special services of #Uzbekistan. In total, at the request of… https://t.co/gswGfEuzo6 pic.twitter.com/Q5F7qM7lmP
— Aqylbek Muratbai (@muratbaiman) October 4, 2023
