Almatydaǵy tekseris kezinde ár ekinshi kólik ekologııalyq normany buzǵany anyqtaldy
ALMATY. KAZINFORM – 3 aqpan kúni Almatyda avtokólikterdiń ekologııalyq talaptarǵa sáıkestigin tekserý boıynsha baqylaý sharalary ótti. Tekseristerdi Eco Almaty JShS Almaty polıtsııa departamentimen birlesip, megapolıstiń ártúrli aýdanynda aspaptyq ólsheýler arqyly júrgizdi.
Qalalyq ekologııa jáne qorshaǵan orta basqarmasynyń ókilderiniń málimetinshe, Saıyn men Dýlatı kósheleriniń qıylysynda mamandar 30 avtokólikti tekserdi. 16 kólikte ruqsat etilgen ekologııalyq kórsetkishtiń artýy tirkeldi. Onyń ishinde eki zańbuzýshylyq dızeldi qozǵaltqyshy bar kólikterden, taǵy 12-si benzınmen júretin avtokólikterden anyqtaldy.
Qosymsha tekserý Súıinbaı dańǵyly men Bekmahanov kóshesiniń qıylysynda uıymdastyryldy. Munda 20 avtokólik tekserildi. Ekologııalyq normatıvterdiń artýy dızel otynymen júretin 6 kólikten anyqtaldy.
– Jalpy 50 avtokólik tekserilip, zańbuzýshylyqtarǵa baılanysty 22 ákimshilik hattama toltyryldy. Qazaqstan Respýblıkasynyń Ákimshilik quqyq buzýshylyq týraly kodeksiniń 334-baby 1-bóligine sáıkes, shyǵaryndylaryndaǵy lastaýshy zattardyń mólsheri nemese shý deńgeıi belgilengen normadan asatyn avtokólikterdi paıdalaný jeke tulǵalarǵa 10 aılyq eseptik kórsetkish, al zańdy tulǵalarǵa 100 AEK mólsherinde aıyppul salýǵa ákeledi, - delingen habarlamada.
Aıta keteıik, avtokólikterdi baqylaý 2025 jyly 30 jeltoqsanda bekitilgen Almaty qalasynyń atmosferalyq aýany qorǵaý qaǵıdalary aıasynda júrgizilip jatyr. Qujat avtokólik quraldaryn qosqanda, shyǵaryndylar kózderine ekologııalyq baqylaýdy kúsheıtýge jáne ásirese qolaısyz meteorologııalyq jaǵdaıda aýanyń lastanýyn azaıtýǵa baǵyttalǵan.
Eske salaıyq, buǵan deıin Almatyda ekologııalyq shekteýleri bar aımaq belgilengenin habarlaǵanbyz.