Almatydaǵy Tastybulaq ózeni boıynda serýendeıtin jańa aımaq ashylady
ALMATY. KAZINFORM — Almatyda Tastybulaq ózeni jaǵalaýyn abattandyrý jumystary qarqyndy júrgizilip jatyr.
Naýryzbaı aýdanynda ózen boıy jańartylyp, osy zamanǵy ınfraqurylymy bar jańa serýen aımaǵy paıda bolady. Bul týraly aýdan ákimi Nazıra Toǵyzbaeva óńirlik kommýnıkatsııalar qyzmetinde ótken brıfıng kezinde aıtty.
Joba aıasynda ózenniń eki jaǵalaýymen jalpy uzyndyǵy 1,4 shaqyrym bolatyn jaıaý júrginshiler aımaǵy salynady. Abattandyrylatyn aýmaqtyń jalpy kólemi — 13,4 myń sharshy metr. Onyń ishinde: kanal qurylysy — 5,8 myń sharshy metr, joldar men trotýarlar — 4,5 myń sharshy metr, kógaldandyrý — 3 114 sharshy metr.
Sonymen qatar 1 576 sharshy metr aýmaqta sýarý júıesi ornatylyp, jaǵalaý boıyna 294 jaryq shamy men 70 shaǵyn sáýlettik nysan qoıylady.
Qurylys jumystary 2025 jyldyń qazan aıynda bastalǵan. Jobany 2026 jyly jeltoqsanda aıaqtaý josparlanyp otyr.
Budan bólek, Tastybulaq shaǵyn aýdanynda sý qubyry men káriz júıelerin tartý boıynsha aýqymdy joba júzege asyrylyp jatyr. Bul jumystar 2027 jyldyń sońyna deıin aıaqtalady dep josparlanyp otyr.
Eske salaıyq, buǵan deıin Almatyda Úlken Almaty kanalyn qaıta jańǵyrtý jumystary bıyl qazan aıynda aıaqtalatynyn habarlaǵanbyz.
Alaıda qala ákimi Darhan Satybaldy nysandy jaz mezgilinde sý jiberip tekserý úshin jumysty jedeldetýdi tapsyrdy.
