Almatydaǵy tanymal saıabaqta buralqy ıtter qaptap júr: ákimdik jaǵdaıǵa qatysty pikir bildirdi
ALMATY. KAZINFORM — Almaty qalasyndaǵy basty saıabaqtardyń biri — 28 gvardııashy-panfılovshylar saıabaǵynda buralqy ıtter kóbeıip ketken. Osy jaǵdaıǵa baılanysty Kazinform agenttigi joldaǵan saýalǵa ákimdik jaýap berdi.
Almaty qalalyq ákimdiginen málim etkendeı, buralqy ıtterdi aýlaýdyń negizgi operatory — Almaty qalasy Kásipkerlik basqarmasynyń «Almaty veterınarııalyq qyzmeti».
— 28 panfılovshy saıabaǵynyń aýmaǵynda janýarlardy aýlaý qyzmetiniń brıgadalary 1-10 mamyr aralyǵynda turaqty reıdter júrgizdi, 3 ıt ustaldy, tuzaq torlary ornatyldy. Búgin, 2025 jyldyń 19 mamyrynda 2 buralqy ıt ustaldy. Qazirgi ýaqytta osy obektide tuzaq torlaryn ustaý jáne ornatý jumystary jalǵasyp jatyr, — delingen ákimdik jaýabynda.
Jalpy, buralqy ıtti aýlaý adam ómiri men densaýlyǵyn qorǵaý, janýarlar aýrýlarynyń aldyn alý jáne ıesiz janýarlardyń sanyn azaıtý maqsatynda júzege asyrylady.
— Aýlaý kásiporynnyń dıspetcherlik +7 (708-89) 5-64-04; 338 29 38 jáne Almaty qalasynyń biryńǵaı «109» qyzmeti arqyly jeke jáne zańdy tulǵalardyń ótinimderi boıynsha tegin júzege asyrylady. Demalys jáne mereke kúnderin qospaǵanda, aýlaý qyzmeti bóliminiń kún saıyn 9 kezekshi brıgadasy (27 qyzmetker) qaraýsyz qalǵan jáne qańǵybas janýarlardy aýlaýǵa shyǵady. Aýlanǵan janýarlar tasymaldanatyn torǵa ornalastyrylyp, ýaqytsha ustaý pýnktine mamandandyrylǵan avtokólikpen jetkiziledi, — dep atap ótti ákimdikten.
Osyǵan deıin Almatynyń 28 panfılovshy saıabaǵynda buralqy ıtter qaptap júrgeni týraly jazǵanbyz.
Buǵan deıin Almaty qalasynyń Kásipkerlik jáne ınvestıtsııalar basqarmasyna qarasty Veterınarlyq qyzmet mamandary Kazinform tilshisine buralqy ıtterdi ustaý jáne aýlaý jumystary qalaı júrgiziletini týraly aıtyp bergen. Olardyń málimetinshe, bıyl bul maqsatqa 580 mln teńge bólingen.
Sondaı-aq qala ákimi turǵyndarmen kezdesý barysynda Almatyda buralqy ıtter máselesiniń qalaı sheshilip jatqanyn baıandaǵan bolatyn.
Aıta ketý kerek, bıyl aýyr jaǵdaıda qalǵan qaraýsyz janýarlarǵa kómek kórsetý úshin eki mamandandyrylǵan brıgada qurylǵan.
Sonymen qatar, Almatyda úı janýarlaryn tegin zararsyzdandyrý baǵdarlamasy júzege asyrylyp jatyr.