Almatydaǵy tanymal qonaq úı mádenı mańyzy bar sýburqaqty sot sheshimimen qaıta jóndeıtin boldy

ALMATY. KAZINFORM – Almaty qalasynyń mamandandyrylǵan aýdanaralyq ekonomıkalyq soty jumystarǵa tapsyrys berýshi retinde Almaty qalasynyń tanymal qonaq úıin mádenı mańyzy bar sýburqaqty jańǵyrtýǵa mindettedi.

Almaty qalasynyń Qala qurylysyn baqylaý basqarmasy qonaq úıden nusqamany májbúrli túrde oryndaýdy talap etti.

«Alaıda buǵan qol jetkize almaı, basqarma qonaq úıdiń „Qazaqstan Respýblıkasyndaǵy sáýlet, qala qurylysy jáne qurylys qyzmeti týraly“ Zańnyń 17-baby 1-tarmaǵynyń 4, 4-1, 6) tarmaqshalaryn buzǵanyn atap kórsetip, Almaty qalasynyń mamandandyrylǵan aýdanaralyq ekonomıkalyq sotyna talap qoıdy. JShS „Qazaqstan“ qonaq úıine irgeles aýmaqta sýburqaqty jańǵyrtýdy júzege asyrǵan bolatyn. Jumys jobalaý-smetalyq qujattamasyz jáne saraptama qorytyndysynsyz, avtorlyq jáne tehnıkalyq qadaǵalaýlarsyz júrgizilgen», — dep jazdy Joǵarǵy sottan.

Biraq sýburqaqty josparlanǵan qaıta jańǵyrtýdyń ornyna basseın qurylysy bastaldy. Sonymen qatar, qurylys-montaj jumystary ruqsat berý qujattarynsyz júrgizilgen.

JShS sýburqaqty óz betinshe jańǵyrtý jóninde anyqtalǵan buzýshylyqtardy joıý týraly nusqamany oryndaý boıynsha sharalar qabyldaǵan joq. Sonymen qatar, joǵaryda atalǵan sýburqaq Almaty qalasynyń jergilikti mańyzy bar tarıhı jáne mádenı eskertkishter tizimine engizilgen qonaq úı ǵımaraty kiretin kúzet aımaǵynyń aýmaǵynda ornalasqan.

Sot osy jaǵdaılardy eskere otyryp, qoıylǵan talapty qanaǵattandyrdy jáne tapsyrys berýshini basqarmanyń buıryǵyn oryndaýǵa májbúrledi.

Sot aktisi zańdy kúshine engen joq.