Almatydaǵy sý qoımalarynda bezgek masalaryna qarsy dezınsektsııalyq óńdeý júrgiziledi
ALMATY. KAZINFORM – Almatyda jazdyń sońyna deıin 6 anafelogendi sý qoımasynda bezgek masalarynyń dernásilderine qarsy dezınsektsııalyq óńdeý júrgiziledi.
Qalalyq sanıtarlyq-epıdemıologııalyq baqylaý departamentiniń basshysy Qasymhan Alpysbaıulynyń aıtýynsha, óńdeý entomologııalyq kórsetkishter boıynsha alty kezeń boıynsha iske asyrylady.
«Alataý, Jetisý jáne Túrksib aýdandarynda ornalasqan 6 anafelogendi sý qoımasynda 2024 jyldyń 6 maýsymynan 30 tamyzyna deıin bezgek masalarynyń dernásilderine qarsy dezınsektsııalyq óńdeý júrgiziledi. Onyń jalpy aýdany – 12,4 gektar», - dedi departament basshysy.
Sý qoımalarynda bezgek masalarynyń dernásilderne qarsy óńdeý jumystaryn respýblıkalyq qarjy esebinen aýdandyq sanıtarııalyq-epıdemıologııalyq baqylaý basqarmalarynyń mamandarynyń tikeleı baqylaýymen, QR Densaýlyq saqtaý mınıstrligi sanıtarııalyq-epıdemıologııalyq baqylaý komıtetiniń «Ulttyq saraptama ortalyǵy» ShJQ RMK «Almaty qalasy boıynsha dezınfektsııa ortalyǵy» fılıaly júrgizedi.
Jasaqtalǵan dezınfektsııalyq brıgadalar qajetti quraldarmen, kóliktermen jáne jeke bas qorǵanysh zattarymen qamatamasyz etilgen.
«Dezınsektsııalyq óńdeý júrgizý úshin «Delteks» ınsektıtsıdti preparaty qoldanylady. Preparat az ýytty jáne qaýiptiligi tómen sanatqa jatqyzylady. Masalarǵa qarsy óńdeý júrgizý úshin qoldanylatyn preparattyń dozasynyń mólsheri az jáne adamdar men janýarlar úshin qaýipsiz», - dedi ol.
