Almatydaǵy stadıon halyqaralyq oıyndardy ótkizýge daıyn – Serik Jarasbaev

ASTANA. KAZINFORM – Ortalyq kommýnıkatsııalar qyzmetinde ótken brıfıng barysynda Týrızm jáne sport vıtse-mınıstri Serik Jarasbaev «Qaırat» pen «Real» komandalary arasyndaǵy oıynǵa qatysty birqatar mańyzdy málimetpen bólisti. 

«Qaırat – «Real matchynyń bıletteri qashan satylymǵa shyǵatynyn jáne baǵasy qandaı bolmatynyn suraǵan jýrnalısterge jaýap bergen Serik Jarasbaev bul máselede negizgi sheshim qabyldaýshy tarap – «Qaırat» fýtbol klýby ekenin atap ótti. 

– Qazirgi tańda bıletterdiń satylymy týraly naqty aqparat joq. Degenmen aldyn ala málimet boıynsha, olar oıynǵa on kún qalǵanda, ıaǵnı 20 qyrkúıek shamasynda satylymǵa shyǵýy múmkin. Bul – «Qaırat» klýbynyń quzyryndaǵy másele. Bıletterdi taratý men baǵany bekitý quqyǵy da tolyǵymen klýbqa tıesili, - dedi ol.

Vıtse-mınıstr jankúıerlerdi beıresmı aqparat kózderine senbeýge shaqyrdy.

– Taǵy bir mańyzdy jaıt – resmı aqparat tek Qazaqstan fýtbol federatsııasynyń saıtynda, sondaı-aq «Qaırat» klýbynyń resmı saıtynda jáne áleýmettik jelidegi paraqshalarynda jarııalanady. Jalǵan aqparat taratýshylarǵa senýdiń qajeti joq, - dedi Jarasbaev.

Sondaı-aq ol bılet baǵasy suranysqa qaraı belgilenetinin atap ótti. 

– Qazirgi ýaqytta baǵa boıynsha naqty sandar joq. Klýb bul máselede qalyptasqan suranysqa súıenip, baǵa saıasatyn retteıdi. Shamamen 20 qyrkúıekke qaraı naqty baǵasy men bılet sany belgili bolady dep oılaımyn, – dep túsindirdi spıker.

Brıfıng barysynda vıtse-mınıstr matchqa arnaıy shaqyrtýlar da qarastyrylǵanyn aıtty.

– Halyqaralyq uıym ókilderi, UEFA músheleri jáne qurmetti qonaqtar úshin arnaıy shaqyrtýlar beriledi. Fan-klýbtar úshin jeke sektorlar bólingen. Bul tájirıbe burynnan qoldanylyp keledi jáne júıeli túrde iske asyrylady, - dedi Jarasbaev. 

Sonymen qatar ol matchqa 60-qa jýyq BAQ ókili akkredıtatsııalanatynyn atap ótti. Naqty tizim jaqyn kúnderi klýbtyń resmı brıfınginde jarııalanady.
Matchtyń ótkizilýine qatysty, alańnyń daıyndyǵy týraly suraqqa jaýap bergen Serik Jarasbaev Almatydaǵy Ortalyq stadıonnyń halyqaralyq deńgeıdegi oıyndarǵa tolyq daıyn ekenin jetkizdi.

– Keıingi ótken oıyndar, sonyń ishinde «Seltıkpen bolǵan kezdesý, stadıonnyń tolyqtaı daıyn ekenin kórsetti. UEFA standarttaryna saı barlyq tekserý ótkizildi. «Realmen» bolatyn oıyn aldynda da stadıon tolyq ınspektsııadan ótti. Barlyq qajetti talap oryndaldy. Tek bir oıyn emes, úıdegi 4 oıyndy ótkizý josparlanyp otyr, – dedi ol.

Vıtse-mınıstrdiń aıtýynsha, eskertýler negizinen trıbýnalar men ÝEFA ókilderi ornalasatyn arnaıy bólmelerge qatysty boldy. Búginde atalǵan kemshilikter tolyq joıylǵan.

Buǵan deıin, almatylyq «Qaırat» 2025/26 maýsymyndaǵy Chempıondar lıgasynyń negizgi kezeńinde «Real Madrıdpen» oınaıtynyn jazǵan edik. 

Eske sala keteıik, Almaty polıtsııasy qala turǵyndary men qonaqtaryn aldaǵy ótetin «Qaırat — Real Madrıd fýtbol matchyna bılet satyp alý kezinde saq bolýǵa shaqyrǵan bolatyn.