Almatydaǵy sońǵy jer silkinisterin japon ǵalymdary zertteıdi
ASTANA. KAZINFORM – Syrtqy ister mınıstrliginiń janyndaǵy KazAID qazaqstandyq halyqaralyq damý agenttigi japon ǵalymdaryn Almatydaǵy jer silkinisin zertteýge shaqyryp otyr. Bul týraly vedomstvonyń resmı ókili Aıbek Smadııarov aıtty.
«2024 jylǵy 16-19 sáýir aralyǵynda Qazaqstan Respýblıkasy Syrtqy ister mınıstrliginiń janyndaǵy KazAID qazaqstandyq halyqaralyq damý agenttigi Almaty qalasynda seısmıkalyq qaýipsizdik máseleleri boıynsha japon mamandarynyń qatysýymen arnaıy semınar uıymdastyrady. Іs-sharany Japonııanyń JICA halyqaralyq damý agenttigi, qazaqstannyń Qurylys salasyndaǵy ǵylymı zertteý jáne jobalaý ınstıtýty, sondaı-aq, Tótenshe jaǵdaılar jáne tabıǵı apattar qaýpin azaıtý ortalyǵy birlesip uıymdastyrady», - dedi ol mınıstrliktiń baspasóz máslıhatynda.
Aıbek Smadııarovtyń sózinshe, Japon mamandary Ortalyq Azııanyń jáne Kavkaz elderiniń ókilderimen seısmıkalyq qaýipsizdik salasyndaǵy tájrıbesin bólisip, seısmıkalyq oqshaýlaý salasyndaǵy ozyq tehnologııalar men standarttar týraly pikir almasyp, seısmıkalyq qurylystaǵy áleýetti yntymaqtastyqty talqylaıdy.
«Sondaı-aq, sarapshylar Almaty jáne Noto qalalaryndaǵy sońǵy jer silkinisterin zertteıdi. Bul bolashaqta seısmıkalyq táýekelderdiń aldyn alý strategııalaryn ázirleýge óz septigin tıgizedi», - dedi SІM resmı ókili.
