Almatydaǵy Shýaqty shaǵyn aýdanynda ınjenerlik kommýnıkatsııaǵa qatysty qordalanǵan másele sheshildi
ALMATY. KAZINFORM – Túrksib aýdanynyń turǵyndary Almaty ákimine ınjenerlik kommýnıkatsııaǵa qatysty uzaq jylǵa sozylǵan máseleni sheshkeni úshin alǵys bildirdi.
Almaty ákimi Erbolat Dosaev jumys sapary kezinde Medeý jáne Túrksib aýdandarynyń turǵyndarymen kezdesip, Shýaqty shaǵyn aýdanynda ınjenerlik ınfraqurylymdy jańǵyrtý boıynsha iske asyrylǵan jobalarmen tanysty.
Túrksib aýdanynyń ákimi Baqytjan Aqjarov qala basshysyna Shýaqty shaǵyn aýdanynda ınjenerlik ınfraqurylymǵa qatysty uzaq jylǵy máseleni sheshý týraly baıandady.
Shaǵyn aýdanda elektrmen jabdyqtaý jelilerin salý boıynsha jobany júzege asyrý aıaqtaldy. Bir jylǵa jeter-jetpes ýaqytta júrgizilgen 5,5 km jelini jańǵyrtý elektr qýatynyń shyǵynyn azaıtýǵa, paıdalaný shyǵyndaryn qysqartýǵa jáne 1500-den astam turǵyndy sapaly elektrmen qamtamasyz etýge múmkindik berdi.
Osy shaǵyn aýdanda uzyndyǵy 17,4 km sýmen qamtý jáne sý burý jelilerin salý jobasy júzege asyryldy. Onyń ishinde 10 km – sý qubyry, 7,4 km – káriz jelisi. Joba aıasynda Aısha Bıbi, Aqtasty, Bereke, Volochaevskaıa, Dýadaq, Máıekti Saıaly, Terekti, Yrǵaıty syndy 9 kóshe qamtyldy. Jumys júrgizgen «Melıorator» merdigerlik uıymy 2023 jyldyń maýsym aıynda joldyń eni boıynsha asfalt tósemdi tolyq qalpyna keltire otyryp, jelilerdiń qurylysyn aıaqtady.
Bul shaǵyn aýdan turǵyndaryna ortalyq sýmen qamtý jáne sý burý jelilerine qol jetkizýdi qamtamasyz etti. Bul úshin turǵyndar qala basshysyna alǵys bildirdi.
Sonymen qatar Volochaevskaıa kóshesiniń káriz aǵyny úshin qajetti eńis joq shaǵyn ýchaskesinde káriz-sorǵy qurylysyn salý jobasy ázirlenip jatyr. Áleýmettik jaýapkershilik aıasynda jobalaýshy jumysty tegin júrgizedi. Memlekettik saraptama shamamen 2024 jylǵy maýsym aıynda shyǵady.
Sondaı-aq, Erbolat Dosaev Shýaqty shaǵyn aýdanyndaǵy kóshkinderdiń aldyn alý josparymen tanysty. Qala basshysy birinshi kezekte turǵyndardyń qaýipsizdigin qamtamasyz etýdi ári megapolıs ákimi shaǵyn aýdanda nóser kárizin salý qajettigin atap ótti.
Qala basshysy gıdrogeologııalyq zertteýler júrgizýge jáne ózen arnasynyń negizin nyǵaıtýǵa nusqaý berdi.
