Almatydaǵy sel qaýpi bar kólder táýlik boıy baqylaýda - TJM
ALMATY. KAZINFORM – Almaty qalasyndaǵy sel qaýpi bar ýchaskelerdegi gıdrologııalyq ahýal Tótenshe jaǵdaılar mınıstrliginiń turaqty baqylaýynda.
TJM málimetinshe, tótenshe jaǵdaılar bólimsheleri men azamattyq qorǵaý qyzmetteri táýlik boıy jerústi jedel toptary men ushqyshsyz ushý apparattarynyń kómegimen monıtorıng júrgizip jatyr.
Aǵymdaǵy jaǵdaıdy baǵalaý úshin TJM áýe kemesimen morenalyq kólderge aerovızýaldy tekserý júrgizildi. Nátıjesinde muzdyqtardyń belsendi erýi men aýa temperatýrasynyń kóterilýine baılanysty kólderdiń qarqyndy tolyp jatqany anyqtaldy.
«Sonymen qatar kólderdiń jarylý, sýynyń arnasynan asý nemese sel aǵyndarynyń qalyptasý qaýpin bildiretin belgiler anyqtalǵan joq», – dep habarlady mınıstrlik.
Qazirgi ýaqytta jaǵdaıdy baqylaý úshin TJM men Almaty qalasy TJD bazasynda 6 jedel shtab jumys isteıdi. Qala aýmaǵynda táýlik boıy baqylaýǵa alynǵan 11 sel qaýpi bar ýchaske belgilengen. Ózenderdiń jaı-kúıi týraly aqparat naqty ýaqyt rejıminde TJM men Almaty qalasy TJD-nyń ahýaldyq zaldaryna jetkizilip otyr.
Aldyn alý sharalary aıasynda Aqsaı ózeniniń arnasy tazartylyp, shamamen 100 tonna turmystyq jáne tabıǵı qoqys shyǵaryldy. Sondaı-aq ózenniń ártúrli ýchaskelerinde jaǵalaýdy bekitý jumystary júrgizilip, ınertti materıaldar men qaptar tóseldi.
TJM málimetinshe, sel qaýpi bar ýchaskelerge monıtorıng táýlik boıy jalǵasýda. Jedel áreket etýge qajetti kúshter men quraldar tolyq daıyndyqqa keltirilgen.
Aıta keteıik, Almaty oblysynda avtojol men demalys aımaqtaryn sý basty.
