Almatydaǵy Saıran kóliniń jaǵalaýyn abattandyrýǵa 4 mlrd teńge bólinedi
ALMATY. KAZINFORM – Almatyda qalalyq Máslıhatynyń kezekti XXII sessııasy ótti. Sessııa barysynda Almaty qalasynyń 2024-2026 jyldarǵa arnalǵan bıýdjetine ózgerister engizý máselesi talqylandy.
Almaty qalasy Qarjy basqarmasynyń basshysy Qanat Sýhambekov jańa jospar boıynsha Saıran kóliniń jan jaǵyn abattandyrý úshin 4 mlrd teńge bólinetinin aıtty.
– Saıran sý qoımasyna irgeles aýmaqty qaıta qurý jáne abattandyrý boıynsha aýqymdy jobany iske asyrý jalǵasyp jatyr. Qazirgi ýaqytta jumystyń 45%-y bitti. Jumysty jalǵastyrý úshin jasyl jelekterdi otyrǵyza bastaý josparlanyp otyr. Jaǵalaýlar tireý qabyrǵalarymen jáne jaıaý júrginshiler ótkelderimen jabdyqtalady. Buǵan jergilikti bıýdjetten 4 mlrd. teńge bólinedi, - dedi ol.
Sondaı-aq basqarma basshysy turǵyn úı-kommýnaldyq sharýashylyq salasyn qarjylandyrýdy 6,9 mlrd. teńgege ulǵaıtýdy usyndy.
Almaty máslıhatynyń depýtattary 2024-2026 jyldarǵa arnalǵan bıýdjetke ózgeris engizýdi qoldap daýys berdi.
Eske salaıyq, buǵan deıin Saıran kóliniń jaǵalaýyn abattandyrý jumystary qashan aıaqtalatynyn jazǵanbyz.
Sondaı-aq 50 jyl ishinde alǵash ret Saıran sý qoımasynyń túbi qoqys pen laı shógindilerden mehanıkalyq túrde tazartylǵanyn jazǵanbyz.
