Almatydaǵy saýda úıleriniń birinen 5 myń veıp tárkilendi

ASTANA. KAZINFORM – Zańsyz saýdamen aınalysqan 42 jastaǵy áıel ustaldy. Bul týraly Polisia.kz saıtynda habarlandy.

Ol Jetisý aýdanyndaǵy saýda úıleriniń birinde Qazaqstanda aınalymyna tyıym salynǵan elektrondy temekilerdi satqan.

– Osy jyldyń 20 maýsymynda veıpterdi satýǵa tyıym salatyn zań kúshine engenin eske salamyz. Osyǵan sáıkes, Qazaqstan Respýblıkasynyń qylmystyq kodeksine 301-1-bap (Shylym shekpeıtin temeki buıymdaryn, elektrondy tutyný júıelerin (veıp), hosh ıistendirgishter men olarǵa arnalǵan suıyqtyqtardy satý) tolyqtyryldy. Shylym shegýge bolmaıtyn temeki ónimderiniń, onyń ishinde elektrondy tutyný júıelerin (veıpter), hosh ıistendirgishter men suıyqtyqtardy qosa alǵanda, olardyń aınalymy úshin qylmystyq jaýapkershiliktiń qarastyrylýy azamattardyń densaýlyǵyn temekiniń jańa túrleriniń jáne quramynda nıkotın bar ónimderdiń zııandy áserinen qorǵaý kúsheıtilgen memlekettik saıasatty kórsetedi. Sondaı-aq halyq arasynda, ásirese jastar arasynda yqtımal qaýipti zattardyń taralýyna baılanysty táýeldilikti azaıtý, – dedi Almaty qalalyq PD ekstremızmge qarsy kúres basqarmasynyń bastyǵy Ashat Dáýletııarov.

Saýda ornyn tintý kezinde bes myń veıp tabylyp, tárkilendi. Atalǵan derek boıynsha Jetisý aýdandyq polıtsııa basqarmasy sotqa deıingi tergeý amaldaryn bastady. Zattaı aıǵaqtar qylmystyq is materıaldaryna qosyldy.

Aıta keteıik, 2024 jyldyń 20 maýsymynan bastap osy ýaqytqa deıin Almatyda veıpterdiń zańsyz aınalymy faktileri boıynsha 23 qylmystyq is qozǵalǵany anyqtaldy.

Sondaı-aq, Taldyqorǵanda 1284 dana veıp satpaq bolǵan eki jigit ustalǵany habarlandy.