Almatydaǵy Sátbaev kóshesi halyqaralyq standarttarǵa saı jańartylady
ALMATY. KAZINFORM – Almatyda Sátbaev kóshesin keshendi kórkeıtý aıasynda jaıly ári qaýipsiz qoǵamdyq keńistik qurylady. Bul jumys Lýganskıı kóshesinen Baızaqov kóshesine deıingi uzyndyǵy 3,7 shaqyrym bolatyn aýmaqta júrgiziledi. Bul týraly Qoǵamdyq keńistikterdi damytý basqarmasynyń ókilderi habarlady.
Joba qalalyq ortany qalyptastyrýdaǵy zamanaýı tásilder men halyqaralyq tájirıbelerdi eskere otyryp ázirlengen. Tujyrymdamany brıtanııalyq LDA Design kompanııasy daıyndaǵan.
Joba aıasynda aýqymdy kógaldandyrý jumystary kózdelgen. Atap aıtqanda, iri japyraqty jáne qylqan japyraqty aǵashtar, butalar men kópjyldyq gúlzarlar egiledi. Bul kósheniń turaqty jasyl qańqasyn qalyptastyryp, aýmaqtyń ekologııalyq jaǵdaıyn jaqsartýǵa múmkindik beredi.
Sondaı-aq, jaryqtandyrý tirekteri jańartylyp, jańa kóriktendirý standarttaryna saı zamanaýı shaǵyn sáýlet nysandary men art-nysandar ornatylady.
Joba aıasynda jaıaý júrginshiler qozǵalysyna basymdyq berilgen jaıly ári qaýipsiz orta qurýǵa erekshe mán berilgen. Eń aldymen, keńistik jaıaý júrginshiler úshin qolaıly etip uıymdastyrylady. Sonymen qatar avtokólik qozǵalysynyń da fýnktsıonaldyǵy saqtalady. Kóshe serýendeýge, demalýǵa jáne kúndelikti paıdalanýǵa yńǵaılanyp, qala turǵyndarynyń barlyq sanaty úshin qoljetimdilik qaǵıdattary eskeriledi.
Jumystar kezeń-kezeńimen júrgizilip, negizgi ýchaskelerde júrginshilerdiń kedergisiz qozǵalysy qamtamasyz etiledi. Alǵashqy kezeńde jumys Respýblıka alańynda bastalyp, 1 maýsymǵa deıin aıaqtalady.
Jobany júzege asyrý nátıjesinde Sátbaev kóshesi tranzıttik aýmaq qana emes, zamanaýı, jasyl ári adamǵa baǵyttalǵan qoǵamdyq keńistikke aınalady. Jańartylǵan kóshe qala turǵyndary men qonaqtary úshin tartymdy demalys jáne serýendeý ornyna aınalyp, Almatynyń ınvestıtsııalyq jáne týrıstik áleýetin arttyra túsedi.
