Almatydaǵy safarı-park jobasy qaıta qolǵa alyna ma
ALMATY. KAZINOFRM — Almaty haıýanattar baǵynyń aýmaǵy aldaǵy ýaqytta keńeıtiledi. Bul úshin qala ákimdigi zoobaqqa irgeles ornalasqan jer telimderin kezeń-kezeńimen satyp alyp jatyr.
Almaty mádenıet basqarmasynyń agenttiktiń resmı saýalyna bergen jaýabyna sáıkes, qala ákimdigi haıýanattar baǵynyń aýmaǵyn keńeıtý úshin oǵan irgeles ornalasqan 10 jer telimin satyp alyp jatyr. Qazirgi ýaqytta bul jumys aıaqtalýǵa jaqyn.
— Búginde bir jer telimi satyp alyndy. Qalǵan jer telimderin satyp alý rásimderi sońǵy kezeńge jetti, — dedi basqarma basshysynyń mindetin atqarýshy Abaı Ospanov.
Bul jer telimderin memleket muqtajy úshin alyp qoıý jáne satyp alý jumystaryn Almatynyń jer qatynastary basqarmasy Qazaqstan Respýblıkasynyń zańnamasyna sáıkes júrgizip jatyr.
Safarı-parkke bólingen jer qaıda ketti?
Buǵan deıin Almaty haıýanattar baǵynyń ıeligindegi Jetigen aýyldyq okrýginde ornalasqan 150 gektar jerge safarı-park salý josparlanǵan edi. Bul jer telimi 2006 jyly Іle aýdany ákiminiń sheshimimen osy joba úshin Almaty qalasynyń qaramaǵyna berilgen.
Alaıda Almaty oblysynyń ákimdigi 2025 jyly qańtarda bul jerdi qaıtarý jóninde Almaty ákimdigine resmı talap joldady. Buǵan Alataý qalasynyń jańa bas jospary negiz bolǵan. Qujatqa sáıkes, bul aýmaqta ındýstrııalyq aýmaq ornalastyrý kózdelgen.
2025 jyldyń maýsymynda Alataý qalasynyń ákimdigi jerdi memlekettik qajettilik úshin májbúrlep alyp qoıý týraly qaýly shyǵardy. Al sol jyldyń qyrkúıeginde Almaty oblysynyń mamandandyrylǵan aýdanaralyq ekonomıkalyq soty ákimdiktiń talap-aryzyn tolyq qanaǵattandyrdy.
Almaty mádenıet basqarmasy bul jerdiń orny qalaı óteletinin túsindirdi.
— Buryn haıýanattar baǵy paıdalanǵan 150 gektar jerdiń ornyna Almaty oblysynyń ákimdigi Jetigen aýyldyq okrýginen basqa jer telimin beredi. Qazirgi ýaqytta bul jerdi zańnamaǵa sáıkes Almaty haıýanattar baǵynyń teńgerimine berý rásimi júrgizilip jatyr, — dep habarlady basqarma.
Almaty haıýanattar baǵy — Qazaqstandaǵy eń kóne haıýanattar zoobaqtyń biri. Ol 1937 jyly ashylǵan. Onyń aýmaǵy — 21 gektar. Munda 380-nen astam janýar túrine jatatyn 3 500-den astam ań-qus mekendeıdi. Olarǵa 220-dan astam qyzmetker kútim jasaıdy.
Eske salaıyq, 2025 jylǵy mamyrda Almaty máslıhatynyń XXVIII sessııasynda tsırk pen haıýanattar baǵyn jańǵyrtý jobasyn ázirleýge 100 mln teńge bólinetini habarlanǵan edi.
Keıin Almaty ákiminiń orynbasary Beıbit Shahanov haıýanattar baǵyn jańǵyrtýǵa daıyndyq aıasyndaǵy negizgi mindettiń biri — oǵan irgeles jer telimderin satyp alý ekenin aıtqan edi. Onyń sózinshe, qazirgi ýaqytta haıýanattar baǵyna kireberistegi joldardyń tarlyǵy men kólik keptelisi kelýshilerge qolaısyzdyq týǵyzyp otyr.
