Almatydaǵy Rozybakıev kóshesi qalaı túrlenedi
ALMATY. KAZINFORM — ál-Farabı dańǵylynan Tóle bı kóshesine deıingi aralyqtaǵy Rozybakıev kóshesi jańartylady. Qala ákimdiginiń málimetinshe, jumystar qalalyq kóshelerdi kóriktendirýdiń biryńǵaı standarty aıasynda júrgiziledi.
— Joba turǵyndar úshin jaıly ári qaýipsiz orta qalyptastyrýǵa baǵyttalǵan. Onyń aıasynda trotýarlardy keńeıtý, veloınfraqurylymdy damytý, zamanaýı jaryqtandyrý júıesi men kóshe jıhazdaryn ornatý kózdelgen, — delingen habarlamada.
Sondaı-aq, kógaldandyrý jaıyna erekshe nazar aýdarylady. Qaıta jańǵyrtý barysynda tamshylatyp sýarý júıesi engiziledi.
— Bul sýarýdyń tıimdiligin arttyryp, sýdy utymdy paıdalanýǵa múmkindik beredi, — dep habarlady qala ákimdigi. Eske salaıyq, buǵan deıin Almatydaǵy Sátbaev kóshesi halyqaralyq standarttarǵa saı jańartylatynyn jazǵanbyz.
Eske sala keteıik, buǵan deıin Almaty qalasy ákimdiginiń 2026 jylǵy 26 naýryzdaǵy №1/1-371 qaýlysyna sáıkes, jeńil relsti kóliktiń (LRT) birinshi jelisiniń birinshi kezegin salý úshin («Almaty-2» temirjol vokzalynan Móńke bı kóshesine deıin) Jetisý, Almaly, Áýezov jáne Alataý aýdandarynyń aýmaǵynda ornalasqan 270 jer ýchaskeleri memleket muqtajyna alynady. Májbúrlep ıelikten shyǵarý merzimi 2028 jyldyń 31 jeltoqsanyna deıin belgilengenin jazdyq.
«Qala jer ortalyǵy» menshik ıelerin habardar etedi. Al Almaty qalasy jer qatynastary basqarmasy zańnamamen belgilengen tártipte jer ýchaskeleriniń menshik ıelerine ótemaqy tóleıdi. Jer telimderi memleket menshigine alynǵan soń, Almaty qalasy jol ınfraqurylymyn damytý basqarmasynyń teńgerimine ótedi.