Birqatar basshy qyzmetinen bosatyldy – mınıstr Almatydaǵy jol apaty týraly pikir bildirdi
ALMATY.KAZINFORM – Іshki ister mınıstri Erjan Sadenov Almatyda bolǵan adam ólimine ákelgen jol-kólik oqıǵasyna qatysty pikir bildirip, jaǵdaıdyń erekshe baqylaýda ekenin atap ótti.
— Almatyda bolǵan jol-kólik oqıǵasy saldarynan qaza tapqandardyń týǵan-týystary men jaqyndaryna kóńil aıtamyn. Buǵan deıin habarlanǵandaı, fakt boıynsha qylmystyq is qozǵaldy. Kúdikti júrgizýshige sot sanktsııasymen qamaýǵa alý bultartpaý sharasy qoldanyldy. Ol zańnyń búkil qatańdyǵymen jazalanady. Meniń tapsyrmam boıynsha Almatyǵa Ózindik qaýipsizdik departamentiniń, Ákimshilik polıtsııa komıtetiniń jáne Jeke qurammen jumys jónindegi departamentiniń qyzmetkerleri jiberildi. Jan-jaqty tekserý júrgizilip jatyr. Sonymen qatar basqa da zań buzýshylyqtardyń bolýy týraly ýájder boıynsha qylmystyq ister qozǵaldy. Birqatar basshy atqaryp otyrǵan qyzmetterinen bosatyldy. Barlyǵyna quqyqtyq baǵa beriletinin erekshe atap ótemin. Eshkim de jaýapkershilikten jaltara almaıdy. Zań bárine ortaq, — dep jazdy ІІM basshysy.
Aıta keteıik, birneshe kún buryn Ál-Farabı dańǵylynda eki avtokólik soqtyǵysyp, saldarynan úsh adam qaza tapty.
Almaty qalasy polıtsııa departamentiniń bastyǵy Aıdyn Qabduldınov halyqpen kezdesý kezinde rezonans týdyrǵan jol-kólik oqıǵasyna qatysty suraqqa jaýap berdi. Ol jol apaty boıynsha qylmystyq is qozǵalyp, sotqa deıingi tergeý amaldary júrgizilip jatqanyn aıtty.
— Zeekr avtokóliginiń júrgizýshisi qazirgi ýaqytta aýrýhanada jatyr. Aldaǵy ýaqytta oǵan qatysty tergeý áreketteri tolyq júrgizilip, júrgizýshi qamaýǵa alynady, — dedi polıtsııa bastyǵy.
