Almatydaǵy reıd: polıtsııa túngi klýbtarda júrgen jasóspirimderdi anyqtady

ALMATY – KAZINFORM. Almatynyń Almaly aýdanynda túngi ýaqytta ótkizilgen reıd barysynda oıyn-saýyq oryndarynda kámeletke tolmaǵandardyń júrgeni anyqtaldy.

Profılaktıkalyq sharany Almaly aýdandyq polıtsııa basqarmasy ýchaskelik ınspektorlar, ıývenaldy polıtsııa, krımınaldyq polıtsııa jáne kóshi-qon qyzmeti mamandarymen birlesip júrgizdi.

Polıtsııanyń málimetinshe, reıdtiń maqsaty – jasóspirimderdiń túngi ýaqytta oıyn-saýyq oryndarynda bolýyna jol bermeý jáne mekemelerdiń zań talaptaryn saqtaýyn baqylaý.

Tekserý barysynda birneshe zańbuzýshylyq anyqtaldy. Onyń ishinde:

• kámeletke tolmaǵandardyń ǵımaratta bolý erejelerin buzý;
• qoǵamdyq tártipti buzý;
• kóshi-qon zańnamasyn saqtamaý;
• temeki ónimderin, kalıan men elektrondy shylymdardy shegýge tyıym salý talaptaryn elemeý.

Máselen, bir barda tynyshtyqty buzý jáne kóshi-qon erejelerine qatysty tórt ákimshilik quqyq buzýshylyq tirkelse, taǵy bir mekemede eki osyndaı derek anyqtaldy. Al temeki jáne elektrondy shylym shegýge tyıym salý talaptaryn buzý boıynsha 17 derek tirkeldi.

– Basty maqsatymyz – turǵyndardyń tynyshtyǵy men qaýipsizdigin saqtaý ǵana emes, ásirese jasóspirimderdiń zańsyz túngi ómirge aralasýyna jol bermeý. Ata-analar men mekeme ıeleri osy máselege erekshe nazar aýdarýǵa tıis, – dedi Almaly aýdandyq polıtsııa basqarmasy bastyǵynyń orynbasary Erjan Orazaev.

Almaty polıtsııasy mundaı reıdterdi turaqty túrde ótkizip turatynyn jáne zań talaptaryn buzǵan mekemelerge qatysty qatań sharalar qoldanylatynyn eskertti.

Eske salaıyq, buǵan deıin Almatynyń oıyn-saýyq ortalyqtarynda túnde antıterrorıstik oqý-jattyǵý ótetinin jazǵan edik.

Almaty polıtsııa departamentiniń málimetinshe, 18-20 tamyz aralyǵynda túngi ýaqytta Mega Almaty aýmaǵynda (Rozybakıev kóshesi, 247a), «MOSKVA Metropolitan» aýmaǵynda (8-shaǵynaýdan, 37/1) jáne arnaıy HQKO-da (Saıaly shaǵynaýdany, Aq-Qaınar kóshesi, 1) josparly antıterrorıstik oqý-jattyǵýlar ótkiziledi.