Almatydaǵy Raıymbek batyr kesenesiniń mańy qalaı ózgeredi
ALMATY. KAZINFORM — Almatydaǵy Raıymbek batyr kesenesiniń mańynda VR tehnologııalarymen jabdyqtalǵan mýzeı men zamanaýı mádenı keńistik paıda bolady.
Almatydaǵy Raıymbek batyr kesenesi aýmaǵynda abattandyrý men qurylys jumystary bastaldy. Joba aıasynda tarıhı nysannyń aınalasy jańartylyp, osy zamanǵy mýzeı kesheni salynady.
Bul týraly Almaty ákiminiń orynbasary Azamat Qaldybekov Óńirlik kommýnıkatsııalar qyzmetinde ótken brıfıng kezinde aıtty.
Onyń sózinshe, jobanyń maqsaty — kesene aýmaǵyn kıeli ári tartymdy mádenı ortalyqqa aınaldyrý, qala turǵyndary men qonaqtaryna tarıhı tulǵanyń erligin dáripteıtin jańa keńistik usyný.
— Qurylys jumystary barysynda kesene mańy tolyq abattanyp, eki jańa ǵımarat salynady. Onyń biri — eki qabatty mýzeı ǵımaraty. Birinshi qabatta mýltımedıalyq ekspozıtsııalar ornalassa, ekinshi qabatta qazaq batyrlaryna arnalǵan tarıhı zal ashylady. Mýzeı zamandyq VR jáne AR tehnologııalarymen jabdyqtalady, — dedi ol.
Jumystar 2026 jylǵy aqpanda bastalyp, mamyrda tolyq aıaqtalady dep josparlanǵan.
Eske salaıyq, buǵan deıin Almaty ákimi Darhan Satybaldy «Raıymbek batyr» memorıaldyq kesheniniń qurylys alańyna baryp, nysannyń sol kezdegi ahýalymen tanysqan edi.
Raıymbek batyr mavzoleıi — Qazaqstannyń kıeli oryndar kartasyna engen, jalpyulttyq mańyzy bar nysan. Qaıta jańǵyrtý aıaqtalǵannan keıin munda uly qolbasshynyń ómiri men erligin baıandaıtyn zamanaýı ekspozıtsııa ashylady.