Almatydaǵy psıhıatrııalyq ortalyqtan qashyp ketken eki naýqas áli izdestirilip jatyr

Joǵalyp ketkender — 1989 jyly týǵan Nellı Shahraı men 1991 jyly týǵan Denıs Antıpın.

Lider.kz eriktileriniń aıtýynsha, olar ár túrli ýaqytta joǵalyp ketti jáne bir-birine qatysy joq.

Nellı Shahraı 16 sáýirde tańǵy saǵat 9:00 shamasynda Bostandyq aýdanyndaǵy Kekilbaıuly kóshesi, 117 mekenjaıyndaǵy psıhıkalyq densaýlyq saqtaý ortalyǵynan shyǵyp ketken.

Boıy — 167 sm, ortasha deneli, qońyr kózdi, shashy uzyn, qoıý sary. Betinde bórtpeler bar. Sońǵy ret ol qoıý kók barqyt jempir, kúlgin shalbar jáne kók rezeńke tápishke kıgen.

Denıs Antıpın 13 mamyrda tańǵy saǵat 8:00 shamasynda shyǵyp ketken.

Boıy 180 sm, ortasha deneli, qoıý sary shashty jáne shashy sál aǵarǵan. Sol kóziniń janynda meńi bar. Ol qashyp ketken kúni qara jıletka, aq fýtbolka, qara shalbar jáne qara tápishke kıgen.

— Qoǵamdyq oryndar jáne adam kóp jınalatyn jerlerde solarǵa uqsas adamdardy kórseńiz, olardy ustaýǵa nemese janjaldasýǵa tyryspańyz. 102 nómirine qońyraý shalyp, polıtsııaǵa habarlaý kerek, — dep jazdy eriktiler.

Almaty polıtsııa departamenti medıtsınalyq mekemede naýqastardyń joǵalyp ketkeni týraly aqparatty rastady.

— Bostandyq aýdandyq polıtsııa bólimi eki jaǵdaı boıynsha da izdeý isterin qozǵady. Qazirgi ýaqytta adamdardyń qaıda ekenin anyqtap, olardy medıtsınalyq mekemege qaıtarý úshin birqatar jedel jáne tergeý sharalary júrgizilip jatyr, — dep habarlady Almaty polıtsııasynyń baspasóz qyzmeti.

Buǵan deıin Almatyda psıhıkalyq densaýlyq ortalyǵynan eki adamnyń qashyp ketkeni týraly jazǵanbyz.

Alaıda naýqastar áli tabylǵan joq edi.