Almatydaǵy oıyn-saýyq ortalyqtarynyń birinen adamdar evakýatsııalandy
ALMATY. KAZINFORM – Saýda ortalyǵyna jarylǵysh zat qoıylǵany týraly jasyryn habarlama túsken.
Qalalyq polıtsııa departamentiniń málimetinshe, aqparat túskennen keıin qalanyń barlyq jedel-qyzmettik bólimsheleriniń jumysy shuǵyl túrde uıymdastyrylǵan. Sondaı-aq azamattardyń qaýipsizdigin qamtamasyz etý maqsatynda turǵyndar men qyzmetkerler evakýatsııalanǵan. Qazir ǵımaratqa arnaıy mamandar tarapynan komıssııalyq tekserý júrgizildi. Onyń qorytyndysy boıynsha jarylǵysh qurylǵylar anyqtalǵan joq. Qazirgi ýaqytta nysandarda qalypty jumys rejımi qaıta qalpyna keltirildi.
– Polıtsııa qyzmetkerleri jalǵan habarlama jasaǵan tulǵany anyqtaýǵa kiristi. Ol Qazaqstan Respýblıkasynyń zańnamasyna sáıkes jaýapkershilikke tartylady. Polıtsııa turǵyndardan qalyptasqan jaǵdaıǵa túsinistikpen qarap, quqyq qorǵaý organdary men shuǵyl qyzmet qyzmetkerleriniń talaptaryn qatań saqtaýdy, sondaı-aq jeke qaýipsizdikti qamtamasyz etý maqsatyndaǵy barlyq nusqaýdy oryndaýdy suraıdy, - dep habarlady departamentten.
Eske salaıyq, buǵan deıin Aqtóbede jarylǵysh zat týraly jalǵan habar bergen jasóspirim ustaldy.