Almatydaǵy Otbasyn qoldaý ortalyǵyna 1 myńnan astam ótinish tústi
ALMATY. KAZINFORM – Almaty qalasynyń Otbasyn qoldaý ortalyǵy dırektorynyń mindetin atqarýshy Aqmoljan Zarıpov mekeme jumysynyń nátıjeleri týraly baıandady.
Onyń aıtýynsha, ortalyq qıyn jaǵdaıǵa tap bolǵan otbasylar men azamattarǵa keshendi kómek kórsetip keledi.
– Bizdiń mindet – tek týyndaǵan máseleni sheshýge járdemesý emes, olardyń aldyn alý. Biz mekemearalyq ózara is-qımyldy jolǵa qoıyp, otbasylardy jaǵdaıy tolyq túzelip ketkenshe kómek beremiz. Kóshpeli jumysqa erekshe nazar aýdaryldy. Qalada bilim berý, densaýlyq saqtaý men quqyq qorǵaý salasynyń ókilderi qatysqan jedel toptar jumys isteıdi. Olar byltyr qoldaýǵa muqtaj otbasylarǵa 146 ret baryp qaıtty, - dedi Aqmoljan Zarıpov.
Byltyr Otbasyn qoldaý ortalyǵyna jalpy 1 341 ótinish túsken jáne onyń 1 283-i oryndalǵan. Mamandar 527 psıhologııalyq jáne 325 zańgerlik keńes bergen. Al 2026 jyldyń basynan beri ortalyqtyń 302 adamǵa túrli qyzmet kórsetti. Onyń ishinde psıhologııalyq, quqyqtyq jáne áleýmettik kómek bar.
Aqmoljan Zarıpov ortalyq tsıfrlyq sheshimderdi engizip jatqanyn aıtty. Áleýmettik kómekti kórsetýdiń FSM Social ıntegratsııalanǵan júıesi aıasynda 3 641 maman oqýdan ótken.
Eske salaıyq, Qazaqstanda Otbasy máseleleri jónindegi ýákil ınstıtýty qurylady.
