Almatydaǵy ortalyq stadıon kógaly Djeı Lo kontsertinen keıin qandaı kúıde
ALMATY. KAZINFORM – 10 tamyzda Almatydaǵy Ortalyq stadıonda ótken Djennıfer Lopes kontserti kógalǵa zaqym keltirdi me degen saýalǵa sport ǵımarattary dırektsııasy jaýap berdi.
Vedomstvonyń Kazinform tilshisine bergen málimetinshe, Almatyda kógaldy saqtaý úshin arnaıy terracover jabyny qoldanylǵan.
Bul jabyn shóptiń «tynys alýyna» jáne ylǵaldy saqtaýǵa múmkindik berip, joǵary temperatýra men tikeleı kún sáýlesiniń áserin azaıtqan.
– Jabyndy kontsert bastalardan 10 saǵat buryn tósep, is-shara aıaqtalysymen birden alyp tastadyq. Keıin mamandar sýarý, tyńaıtqysh sebý jáne basqa da kútim sharalaryn júrgizdi, - delingen habarlamada.
Dırektsııa kógaldyń qazir jaqsy jaǵdaıda ekenin jáne fýtbol matchtaryn qabyldaýǵa daıyn ekenin habarlady.
Aıta keteıik, 7 tamyzda Ózbekstan astanasy Tashkent qalasyndaǵy «Mıllıı» («Býnedkor») stadıonynda amerıkalyq pop-juldyz Djennıfer Lopes kontsert qoıdy. Іs-sharadan keıin áleýmettik jelilerde alańdaǵy kógaldyń jaǵdaıyna qatysty syn-pikirler tarap, jergilikti fýtbol qaýymdastyǵy onyń qalpyna keltirý quny 1 mln dollar bolatynyn habarlaǵan.
Sonymen qatar drenaj júıesi de zaqymdanǵany aıtyldy, al tolyq qalpyna keltirý jumystary eki aıǵa sozylýy múmkin.
Mundaı jaǵdaı Armenııada da bolǵan – ánshiniń kontserti ótkennen keıin alań jaramsyz kúıge túsip, aldaǵy qyrkúıekte ótetin álem chempıonatynyń irikteý matchy aldynda ony jóndeýge týra kelip otyr.
Eske salaıyq, buǵan deıin Djeı Lonyń Almatydaǵy kontserti qalaı ótkenin jazǵan edik.
Sonymen birge sýretshi Ásel Bekjan Kazinform agenttigine bergen eksklıýzıv suhbatynda Djeı Loǵa erekshe art-nysandy qalaı jasap, syıǵa tartqanyn aıtyp bergen edi.