Almatydaǵy N.Sats atyndaǵy teatrdy jóndeýge 21,7 mlrd teńge bólindi

ALMATY. KAZINFORM – Almatyda N.Sats atyndaǵy orys memlekettik akademııalyq balalar men jasóspirimder teatrynyń ǵımaratyn rekonstrýktsııalaý jumystary jaqynda bastalady.

Almaty ákimdiginiń málimetinshe, rekonstrýktsııalaý jobasy memlekettik saraptamadan ótip, qala basshylyǵy qurylys jumystaryn júrgizetin merdiger uıymdy anyqtaý úshin baıqaý jarııalady.

Almatynyń qurylys basqarmasy bul jobaǵa nelikten 21,7 mlrd teńge bólingenin túsindirdi. Basqarma jaýabyna sáıkes, teatr ǵımaraty 1980-jyldary salynǵan jáne sodan beri oǵan eshqashan kúrdeli jóndeý júrgizilmegen.

- Teatr ujymy ǵımarattyń múshkil jaǵdaıyna qoǵamnyń nazaryn birneshe ret aýdarǵan. Qala ákimine júgingennen keıin ol megapolıs úshin mańyzy zor nysandy rekonstrýktsııalaýǵa tapsyrma berdi. Tehnıkalyq zertteý barysynda jabdyqtardyń, ınjenerlik jelilerdiń, shatyrdyń, qasbet taqtalarynyń jáne ishki árleý jumystarynyń edáýir tozǵany anyqtaldy. Shatyrdan aqqan sý sahna men kórermen zalyna deıin jetedi, qasbettiń taqtalary qulap, júrginshilerge qaýip tóndirip otyr. Al eski elektr symdary órt qaýpin týdyrady. Qazirgi tańda ǵımarat qaýipsizdik talaptaryna sáıkes kelmeıdi jáne estetıkalyq kórinisin joǵaltqan, – dedi basqarma basshysy Almas Shabdarbaev.

Rekonstrýktsııalaý jobasyna sáıkes, ǵımarattyń tirek qurylymdary nyǵaıtylady, shatyr men qasbet taqtalary aýystyrylady jáne barlyq ınjenerlik kommýnıkatsııa jańartylady. Ǵımarat tolyq avtomatty órt sóndirý júıesimen jabdyqtalmaq. Sondaı-aq teatr jabdyqtary, jaryqtandyrý, sahna tolyqtaı jańartylyp, oryndyqtar arasyndaǵy ótpeler keńeıtilip, múmkindigi shekteýli jandar úshin qolaıly jaǵdaı jasalady. Bul jumystardyń barlyǵy 14,6 myń sharshy metr bolatyn qoldanystaǵy ǵımaratty rekonstrýktsııalaý jumystary aıasynda júrgizilmek.

Sonymen qatar qazirgi teatr janynda 10 myń sharshy metrlik úsh qabatty jańa ǵımarat salý josparlanǵan. Jańa ǵımaratta 200 oryndyq sahnasy bar zal, grım bólmeleri, sheberhanalar men tsehtarǵa arnalǵan bólmeler, dekoratsııalardy saqtaýǵa arnalǵan qoımalar, kórkemdik jetekshi qyzmetkerlerge arnalǵan kabınetter, balalar teatr stýdııasyna arnalǵan oqý sahnasy men synyptar ornalasady. Eki ǵımaratty galereıalyq ótkel baılanystyratyn bolady.

- Bólingen qarajattyń qurylymyn qarasaq, eki ǵımaratty zamanaýı jabdyqpen tolyq qamtamasyz etýge shamamen 6 mlrd teńge qajet. Qoldanystaǵy ǵımaratty rekonstrýktsııalaýǵa 6 mlrd teńge jáne jańa ǵımarat salýǵa shamamen 9 mlrd teńge qarastyrylǵan. Sonymen qatar, eki ǵımaratty baılanystyratyn galereıa salynady, syrtqy jeliler aýystyrylady jáne irgeles aýmaqty kógaldandyrý men kórkeıtý jumystary júrgiziledi. Bul aýqymdy joba, – dedi Almas Shabdarbaev.

Almaty ákimdiginiń málimetinshe, negizgi ǵımarattyń rekonstrýktsııalaý jumystaryn osy jyldyń sońyna deıin aıaqtaý josparlanǵan, al jobanyń tolyq aıaqtalýy 2026 jyldyń birinshi toqsanyna belgilengen.

Eske salaıyq, buǵan deıin megapolıstegi veloınfraqurylym qalaı damytý josparlanǵanyn jazǵanbyz.