Almatydaǵy N.Sats atyndaǵy teatrdy jańartýǵa taǵy 3,5 mlrd teńge bólindi

ALMATY. KAZINFORM – Almatyda qalalyq máslıhattyń kezekten tys sessııasy ótti.

Almaty qalasy ekonomıka jáne qarjy basqarmasynyń basshysy Baýyrjan Qudaıbergenov Natalııa Sats atyndaǵy Balalar men jasóspirimder teatry ǵımaratyn qaıta jańartý jáne oǵan qosymsha qurylys salý jumystaryn bıyl aıaqtaý josparlanǵanyn aıtty. Jobany aıaqtaýǵa bıyl bıýdjet qarajatynan 3,5 mlrd teńge qarastyrylǵan. 

Teatrdy jańartý jumystary byltyr naýryz aıynda bastalǵan. Joba quny bastapqyda 21,7 mlrd teńge boldy, keıin 23,9 mlrd teńgege deıin ulǵaıtyldy. Almatynyń eks-ákimi Erbolat Dosaev joba baǵasy memlekettik saraptama negizinde belgilengenin aıtqan edi. 

Rekonstrýktsııalaý jobasyna sáıkes, ǵımarattyń tirek qurylymdary nyǵaıtylady, shatyr men qasbet taqtalary aýystyrylady jáne barlyq ınjenerlik kommýnıkatsııa jańartylady. Ǵımarat tolyq avtomatty órt sóndirý júıesimen jabdyqtalmaq. Sondaı-aq teatr jabdyqtary, jaryqtandyrý, sahna tolyqtaı jańartylyp, oryndyqtar arasyndaǵy ótpeler keńeıtilip, múmkindigi shekteýli jandar úshin qolaıly jaǵdaı jasalady.

Sonymen qatar qazirgi teatr janynda 10 myń sharshy metrlik úsh qabatty jańa ǵımarat salynyp jatyr. Jańa ǵımaratta 200 oryndyq sahnasy bar zal, grım bólmeleri, sheberhanalar men tsehtarǵa arnalǵan bólmeler, dekoratsııalardy saqtaýǵa arnalǵan qoımalar, kórkemdik jetekshi qyzmetkerlerge arnalǵan kabınetter, balalar teatr stýdııasyna arnalǵan oqý sahnasy men synyptar ornalasady. Eki ǵımaratty galereıalyq ótkel baılanystyratyn bolady. 

Eske salaıyq, Almatynyń bıylǵy naqtylanǵan bıýdjeti 2,8 trln teńge boldy.