Almatydaǵy notarıýstar men advokattardyń sany qansha
ALMATY. KAZINFORM - Almatyda notarıýstaryna byltyr 83 tekserý júrgizilgen.
Almaty qalasy Ádilet departamentiniń basshysy Balaım Kesebaevanyń aıtýynsha, búgingi kúni Almatyda 947 notarıýs jumys isteıdi. Ótken jyly notarıýstar jumysynyń zańdylyǵyn tekseretin 83 tekserý júrgizilgen, onyń ishinde 79-y jospardan tys, 4-i josparly túrde bolǵan. Tekseris nátıjeleri boıynsha 11 notarıýs jumysyn toqtatqan, al 18 notarıýs tártiptik jaýapkershilikke tartyldy.
Sonymen qatar Ádilet departamentiniń basshysy Almaty aýmaǵynda jumys isteıtin advokattarynyń sany 1010 ekenin atap ótti.
- Almatyda 1 aýmaqtyq advokattar alqasy, 16 quqyqtyq keńes beretin oryn jáne 48 advokattyq keńse jumys isteıdi. Ótken jyly almatylyq advokattardyń jumysyna 67 shaǵym tústi. Onyń ishinde 21 shaǵym boıynsha dálelder rastaldy jáne tıisti sharalar qoldanyldy. 9 advokat eskertý aldy, altaýy sógis, ekeýi qatań sógis aldy jáne 4 adam múshelikten shyǵaryldy, - dedi ol.
Ádilet departamentiniń málimetinshe, memleket kepildik bergen zań kómegi boıynsha Almatyda advokattar 19 763 azamatqa tegin zań kómegin kórsetken.
- UOS qatysýshylary, olarǵa teńestirilgen adamdar, sondaı-aq basqa memleketterdiń aýmaǵyndaǵy áskerı qımyldardyń ardagerleri, merzimdi qyzmettegi áskerı qyzmetshiler, 1 jáne 2 toptaǵy múgedektigi bar adamdar, jasy boıynsha zeınetkerler, kóp balaly otbasylar, az qamtylǵan azamattar tegin quqyqtyq keńes ala alady. Sondaı-aq asyraýshysynyń qaıtys bolýynan, jumysqa baılanysty densaýlyqqa keltirilgen zııannyń ornyn toltyrýdan nemese qylmystyq quqyq buzýshylyqtan, jynystyq zorlyq-zombylyqtan, adam saýdasynan zardap shekkender, osy mártebege nemese jaǵdaıyna baılanysty tegin zańdy keńes ala alady, - dedi Balaım Kesebaeva.
Eske salaıyq, buǵan deıin mınıstr Ákimshilik quqyq buzýshylyq týraly kodekske engizilgen basty ózgeris týraly aıtqanyn jazǵanbyz.