Almatydaǵy neke saraıy taǵy da senimgerlik basqarýǵa berilmek
ALMATY. KAZINFORM — Almatydaǵy qaraýsyz qalǵan «Jas Otaý» neke saraıy elektrondy saýda-sattyqqa shyǵaryldy.
Nysan e-Qazyna.kz elektrondy saýda alańynda ornalastyrylǵan.
2 qabatty ǵımarat Abaı dańǵyly, 101A mekenjaıynda ornalasqan. Jalpy aýmaǵy 2 myń sharshy metrden asady. Nysanmen birge jańa basqarýshyǵa sýburqaq ta beriledi.
Ekinshi qabatynda jartylaı dóńgelek balkon, ony tirep turǵan iri aq baǵandar bar. Tómengi bóliginde tas qorshaýly saltanatty baspaldaq, bıik terezeler men shyny kireberis ornalasqan.
Alaıda ǵımarattyń qazirgi jaǵdaıy kóńil kónshitpeıdi. Qabyrǵalaryndaǵy sylaq opyrylyp, armatýrasy ashylyp qalǵan. Karnızdiń sándik elementteri de búlingen. Birinshi qabat pen balkonnyń aýmaǵy qurylys qaldyqtary salynǵan qaptar men qoqysqa toly.
Sonymen qatar neke saraıy satylmaıdy, ol 10 jyl merzimge senimgerlik basqarýǵa beriledi.
Jańa basqarýshy 12 qarashada anyqtalmaq. Bul úshin ótinim berýshiler bolýy kerek.
Jańa basqarýshyǵa qoıylatyn talaptar
Senimgerlik basqarý týraly úlgilik shartta bolashaq basqarýshyǵa birqatar mindet júktelgen:
* nysanǵa keminde 1 mıllıard teńge ınvestıtsııa salý;
* basqarýdan túsken taza kiristi jergilikti bıýdjetke aýdarý;
* múlik pen jer salyǵyn óz esebinen tóleý;
* shart talaptaryn buzǵan jaǵdaıda keltirilgen zalaldy óteýge mindetti.
Sonymen qatar jańa basqarýshy bir jyl ishinde ǵımarattyń qasbetin qalpyna keltirip, terezeleri men vıtrajdaryn aýystyrýy kerek. Jóndeý kezinde nysannyń tarıhı kelbeti saqtalýy tıis.
Budan bólek, jylytý jáne santehnıka júıelerin aýystyrý, shatyr men kúmbezdi jóndeý, jańa jabdyqtar men jıhaz satyp alý mindettelgen.
Basqarýshy bir jyldyń ishinde demalys aımaǵyn (alleıa nemese shaǵyn sáýlet nysandary bar skver) abattandyryp, aýmaqty kógaldandyrýy jáne avtomatty sýarý júıesin ornatýy qajet. Sondaı-aq Esentaı ózeni arqyly ótetin kópirdi de retke keltirýi tıis.
Ǵımarat ishindegi oryndardy jalǵa berýge jáne odan tabys tabýǵa ruqsat etiledi. Alaıda bul nysannyń qoldanystaǵy maqsatyna sáıkes júzege asyrylýy kerek. Al ǵımaratty satýǵa, kepilge qoıýǵa, syıǵa tartýǵa bolmaıdy.
Buǵan deıin birneshe ret senimgerlik basqarýǵa berildi
2023 jylǵa deıin ǵımarat jeke kompanııanyń senimgerlik basqarýynda bolǵan. Alaıda kompanııa óz mindettemelerin oryndamaǵandyqtan, kelisimshart sot arqyly buzyldy.
2023 jyldyń qazanynda nysan qala balansyna qaıtaryldy. Al 2024 jyly basqa bir JShS-niń senimgerlik basqarýyna berildi. Biraq 2026 jyly bul kompanııamen jasalǵan kelisimshart ta mindettemelerdiń oryndalmaýyna baılanysty buzyldy.
Sodan soń senimgerlik basqarýǵa berilgen neke saraıy qalaǵa qaıtaryldy.
