Almatydaǵy Nazarbaev dańǵylynda qozǵalys shekteledi

ALMATY. KAZINFORM — Almaty ákimdigi qala turǵyndaryna Nazarbaev dańǵylynda jóndeý jumystaryna baılanysty qozǵalysqa shekteý engiziletinin eskertti. 

Jol ınfraqurylymyn damytý basqarmasynyń málimetinshe, búginnen bastap Nazarbaev dańǵylynyń ál-Farabı dańǵylynan Tóle bı kóshesine deıingi bóliginde joldaǵy qudyq qaqpaqtaryn kóterý jumystary júrgiziledi.

Osyǵan baılanysty 3 kún qozǵalysqa ýaqytsha shekteý engizilýi múmkin.

— Jóndeý jumystary júrgizilip jatqan ýchaskelerde eskertý belgileri qoıylady. Turǵyndardan baǵytyn aldyn ala josparlaýdy suraımyz, — dedi basqarma ókilderi.

Eske salaıyq, buǵan deıin Almatynyń energetıka jáne sýmen jabdyqtaý basqarmasy agenttik saýalyna jaýap berip, qalada qashan jylý berý toqtaıtynyn habarlady.